Jamoatchilik va olimlar bir yildan oshiq vaqtdan beri Madaniyat vazirligi timsolida Mingo‘rik arxeologik obidasi muammosiga davlat e’tiborini tortishga urinmoqda.
Toshkent markazidagi ikki ming yillik tarixga ega yodgorlikda yoriqlar paydo bo‘lgan. Arxeologik tadqiqotlar instituti Toshkent bo‘limi mudiri, tarix fanlari doktori Abduhakim Anorboyev va Toshkent arxeologik ekspeditsiyasi rahbari Margarita Filanovich obidaga ikki minorali ulkan paxsa devor tahdid qilmoqda degan xulosaga keldi. Nafaqat qadimiy inshoot, balki hozirgi davrda tiklangan zinapoyada ham yoriqlar paydo bo‘lgani bu xulosani tasdiqlaydi.
2009-yili, yodgorlik arxeologlar tomonidan tadqiq qilinganidan so‘ng vazirlik bu yerni konservatsiya qildi. Hudud usti yopilib, atrofga to‘siq o‘rnatildi. Ko‘rilgan choralar yetarli bo‘lmagandek tuyuldimi, xom g‘ishtdan devor aylantirildi. Devor biroz muddat turib, nuray boshladi. Shundan so‘ng devorga paxsadan “ko‘ylak” kiygizildi va ikki minora tiklandi. Bu yangilikning taxminiy vazni 400 ming tonnani tashkil etadi.
“Bu ulkan og‘irlik qo‘riqlanadigan obyektning o‘zini pastga tortyapti. U barpo etilgan vaqt, ya’ni 10 yildan beri har yili devorlarda darzlar paydo bo‘layotganini ko‘rish mumkin. Buning chorasi ko‘rilmasa, yodgorlik to‘liq vayron bo‘lishi mumkin”, — deya ogohlantirgandi Abduhakim Anorboyev 2018-yil 17-avgustdagi xulosasida.
Hammadan ham ichki yo‘lak devorida hosil bo‘lgan darz xavotirga solmoqda. Boshqa yoriqlar kabi u ham ko‘p ming tonnalik paxsa devor tomon yo‘nalgan. 2 ming yillik Mingo‘rik darzlar bilan qoplanib, butkul yo‘q bo‘lib ketish xavfi ostida.
Izoh (0)