Транспорт ва логистика масалаларини оператив кўриб чиқиш бўйича Идоралараро комиссия томонидан ички туризмни рағбатлантириш учун субсидиялар миқдори тасдиқланди. Бу ҳақда Туризм ва спорт вазирлиги матбуот хизмати хабар берди.
Унга кўра, авиаташувчиларга мамлакатдаги ички авиақатновлар чипта нархларининг 25 фоизи миқдорида, шунингдек, туроператор ва турагентлар томонидан маҳаллий сайёҳлар учун ташкил этилган турларга авиа ва темир йўл чипталари нархининг 15 фоизи миқдорида субсидиялар ажратиладиган йўналишлар белгиланди.
Шунингдек, субсидияланадиган 10 та авиақатнов йўналиши чипта нархларининг энг юқори суммалари ҳам тасдиқланган. Мисол учун, Самарқанд—Наманган авиақатновидаги чипта нархи 666,7 минг сўмни ташкил этган бўлса, авиаташувчига бериладиган субсидия ҳисобига ушбу чипта нархининг энг юқори суммаси 500 минг сўмни ташкил этади. Чипта туроператор орқали харид қилинганда эса унинг нархи 425 минг сўмни ташкил қилади.
Шу билан бирга, Вазирлар Маҳкамасининг 2012 йил 13 апрелдаги 109-сон қарорида назарда тутилган жамоавий чипталарни сотиб олиш гуруҳидагилар сони 10 нафардан 24 нафаргача бўлганда — 10 фоизли, 25 ва ундан ортиқ кишилик гуруҳ учун эса 15 фоизли чегирмалар ҳам сақланиб қолинган.
Йўловчи поездлари чипта нархларига (тарифлар) ўзгариш киритилган тақдирда бу тўғрисида «Ўзбекистон темир йўллари» АЖ, Туризм ва спорт вазирлигининг расмий сайтлари ҳамда бошқа ОАВлар ва ижтимоий тармоқларда кенг эълон қилиниб борилиши белгиланди.
Шунингдек, қарор билан республика бўйлаб жойлаштириш воситаларининг меҳмонхона хизматлари нархларининг субсидияланадиган энг юқори (чекланган) даражаси (суммаси) 250 минг сўм этиб тасдиқланди. Бунда туроператор ва турагент томонидан республика бўйлаб ташкил этилган тур давомида меҳмонхона хизматининг 10 фоиз миқдоридаги субсидияланадиган энг юқори суммаси 25 минг сўмдан ошмаслиги белгиланган.
Президентимизнинг ички ва зиёрат туризмини ривожлантириш тўғрисидаги фармонининг имзоланиши Фарғона водийсида истиқомат қилувчи аҳолининг ҳам Бухоро, Самарқанд ҳамда Хоразм вилоятларига, ушбу ҳудудлар аҳолисини эса Фарғона водийсига саёҳат қилишлари учун қулай имконият тақдим этади.
Хусусан, 2021 йилнинг февраль ойида йўлга қўйилган Урганч—Фарғона—Урганч авиайўналишининг биринчи ойида самолётларнинг бандлиги 43,7 фоизни ташкил этган бўлса, туроператор ва турагентларга яратилган қўшимча имконият натижасида самолётлар бандлиги март ойида 87,9 фоизга, яъни икки баробарга ошган.
Изоҳ (0)