Sanitariya-epidemiologik osoyishtalik va jamoat salomatligi xizmatining Toshkent shahar boshqarma bo‘limi boshlig‘i Nodira Sultonmurodova poytaxtda karantinga olingan joylar haqida ma’lumot berdi.
Uning ma’lum qilishicha, poytaxtda 132 ta maktab, 22 ta bog‘cha, 15 ta o‘rta maxsus ta’lim muassasasi, 35 ta oliy o‘quv yurti, uchta davolash-profilaktika muassasasi, ikkita xizmat ko‘rsatish obyekti 14 kunlik karantinga olingan.
Avvalroq Farg‘ona davlat universiteti karantinga yopilgani, Guliston davlat universiteti ham to‘liq 14 kunlik masofaviy ta’limga o‘tkazilgani, Toshkent davlat sharqshunoslik universitetida darslar 22-apreldan masofaviy shaklga o‘tkazilgani, Toshkent axborot texnologiyalari universiteti 14 kunlik karantinga olingani, O‘zJOKUda masofaviy ta’lim o‘quv yili oxirigacha davom ettirilishi haqida xabar berilgan edi.
Bundan avval Jismoniy tarbiya va sport universiteti va Jahon tillari universiteti hamda uning akademik litseyi ham o‘quv jarayonlari onlayn shaklga o‘tkazilgandi. Jahon iqtisodiyoti va diplomatiya universiteti 19-apreldan, Samarqand iqtisodiyot va servis institutida esa 20-apreldan 14 kunga masofaviy shaklga o‘tkazilgani haqida xabar berilgandi.
Eslatib o‘tamiz, O‘zbekistonda 28-aprel kuni 4 ta, 29-aprel kuni 2 ta hamda 30-aprel kuni 3 ta ta’lim muassasasi masofaviy ta’lim shakliga o‘tgandi.
Izoh (0)