Samarqand viloyati Pastdarg‘om tumanida 27-aprel kuni 37 yoshli tanishini aldov yo‘li bilan Turkiyaga fohishalik uchun sotib yuborayotgan erkak ushlandi. Bu haqda Tergov departamenti xabar berdi.
Qayd etilishicha, aprel oyining boshlarida 28 yoshli erkak A.H. tanishi 37 yoshli I.O.ning ishonchiga kirgan. Unga Turkiyadan yaxshi ish topib berishini va u yerga ketishida ham yordam berishini va’da qilib, unga tegishli fuqarolik pasportini olib qo‘ygan. I.O.ni fuqaro S.ga 1000 AQSh dollar evaziga sotishga kelishgan.
Ma’lum qilinishicha, A.H. 27-aprel kuni soat 22:00 larda Pastdarg‘om tumani “Tinchlik” mahallasida joylashgan kafelardan birida fuqaro S. bilan savdolashib, 1000 AQSh dollardan 800 AQSh dollarni olayotgan vaqtida viloyat Ichki ishlar boshqarmasi TEQKB va Pastdarg‘om tumani Ichki ishlar bo‘limi TEQKG xodimlari tomonidan qo‘lga olingan.
Mazkur holat yuzasidan Pastdarg‘om tumani IIB huzuridagi Tergov bo‘limi tomonidan A.H.ga nisbatan Jinoyat kodeksining 135-moddasi 1-qismi (odam savdosi) bilan jinoyat ishi qo‘zg‘atilgan. Hozirda tergov harakatlari olib borilmoqda.
Bundan avval Navoiyda 3 yoshli farzandini 60 mln so‘mga sotmoqchi bo‘lgan ayol ushlangani, Navoiyda fuqaroni fohishalikka yollab, uni Qirg‘iziston orqali Turkiyaga jo‘natmoqchi bo‘lgan ayolga jinoyat ishi qo‘zg‘atilgani hamda Toshkent xalqaro aeroportida fuqaroni xorijga fohishalik qilish uchun jo‘natayotgan 20 yoshli qiz va uning sherigi ushlangani haqida xabar berilgandi.
Izoh (0)