Buxoroda yashovchi 20 yoshli qiz va uning sherigi moddiy jihatdan qiynalgan boshqa qizni xorijga fohishalik qilish uchun jo‘natayotgan vaqtda qo‘lga olindi, deya xabar bermoqda IIV.
Buxoro viloyati Ichki ishlar boshqarmasi Terrorizm va ekstremizmga qarshi kurashish boshqarmasi, Odam savdosi va noqonuniy migratsiyaga qarshi kurashish bo‘limi xodimlari tomonidan tezkor tadbir o‘tkazilgan.
Unda Buxoro viloyati Jondor tumanidagi Askarcha qishlog‘ida yashovchi, 2001-yilda tug‘ilgan, turmushga chiqmagan B.M. ismli qiz va uning jinoiy sherigi Jondor tumani “Zangi” mahallasida yashovchi 1990-yilda tug‘ilgan A.F. Ummon Arab Respublikasidagi yana bir jinoiy sherigi 1988-yilda tug‘ilgan R.M. ismli ayol bilan oldindan jinoiy til biriktirib, Jondor tumani “Xo‘jahayron” mahallasida yashovchi, 1993-yilda tug‘ilgan T.Sh. ismli qizning moddiy ahvoli og‘irligidan foydalanib, uni Ummonning Maskat shahrida ko‘p pul topishga ishontirib, fohishalik qilish uchun yollagan.
Qiz jinoiy sherigi M.R. orqali uning nomiga Toshkent—Istanbul—Maskat yo‘nalishli aviachipta rasmiylashtirib, ushbu chipta, viza, chet elga chiqish pasporti uchun to‘lovlarni o‘zining hisobidan to‘lash orqali uni moddiy jihatdan o‘ziga qaram qilib, Maskat shahriga yetib borganidan keyin xarajatlar uchun unga 5000 AQSh dollari ishlab berishi to‘g‘risida kelishgan.
Qiz va uning sherigi T.Sh.ni Islom Karimov nomidagi Toshkent xalqaro aeroportidan Ummonning Maskat shahriga yuborayotgan vaqtida ashyoviy dalillar bilan qo‘lga olingan.
Mazkur holat yuzasidan viloyat Ichki ishlar boshqarmasi Tergov boshqarmasi tomonidan B.M. va A.F.ga nisbatan Jinoyat kodeksining 135-moddasi 2-qismi “g, z” (aybdorga moddiy jihatdan yoki boshqa jihatdan qaram bo‘lgan shaxsga nisbatan odam savdosi) bandlari bilan jinoyat ishi qo‘zg‘atilib, dastlabki tergov harakatlari olib borilmoqda.
Bundan avval Andijonda ikki nafar tanishini Turkiyaga fohishalik qilishga olib ketmoqchi bo‘lgan namanganlik ayol qo‘lga olingani, Toshkentda 8 oylik o‘g‘lini 10 ming dollarga sotishga uringan ayol ushlangani hamda Turkiyada yashovchi shaxsga 22 yoshli qizni sotib yuborgan toshkentlik ayolga nisbatan jinoiy ish qo‘zg‘atilgani haqida xabar berilgandi.
