Janubiy Koreyaga 63 nafar o‘zbekistonlik ishlash uchun jo‘nab ketdi

O‘zbekistondan Janubiy Koreyaga mavsumiy ishda ishlash uchun 63 nafar fuqaro jo‘nab ketdi, deya xabar bermoqda “Dunyo” axborot agentligi.

Qayd etilishicha, Bandlik va mehnat munosabatlari vazirligi hamda Janubiy Koreyaning Kanvondo provinsiyasi, Yanggu okrugi administratsiyasi o‘rtasida mavsumiy ishchilar to‘g‘risida ilk marotaba kelishuv tuzilgan.

Kelishuvga asosan 2021-yil 16–17-mart kunlari Namangan viloyatida Janubiy Koreya Yanggu okrugi hududida 5 oylik mavsumiy ishlarda (E-8 vizasi) vaqtinchalik mehnat faoliyatini amalga oshirish istagida bo‘lgan fuqarolar uchun Koreya kompaniyasi vakillari tomonidan tanlov o‘tkazilgan edi. Shu bilan birga, 5-may kuni yana 103 nafar O‘zbekiston fuqarosi Janubiy Koreyaga ketishi kutilmoqda.

Bugun mazkur fuqarolarning dastlabki guruhi, ya’ni 63 nafari Toshkent xalqaro aeroportidan charter reys orqali Koreyada 5 oylik mavsumiy ishlarda vaqtinchalik mehnat faoliyatini amalga oshirish uchun jo‘nab ketdi.

Manzilga yetib borgan muhojirlar 14 kunlik karantin uchun izolyatsiya qilingan joylarga jo‘natiladi. O‘zini izolyatsiya qilish paytida fuqarolar barcha zarur vositalar bilan ta’minlanadi.

Bundan avval Qozog‘istonda pasport va oylik maoshlari berilmayotgan o‘zbekistonlik mehnat migrantlari muammolari o‘rganilayotgani, Tashqi mehnat migratsiyasi agentligi Kanadada ishlashni xohlovchilar uchun vakansiya e’lon qilgani hamda O‘zbekistondan yanvar–fevral oylarida 4000 ga yaqin fuqaro ishlash uchun xorijga jo‘nab ketgani haqida xabar berilgandi.