Qirg‘iziston hukumatining Botken viloyatidagi muxtor vakili ma’lum qilishicha, Tojikiston Laylak tumanidagi Internatsional qishlog‘ining o‘n nafar aholisini ozod etgan, ular 30-aprel kuni garovga olingan edi, deb yozadi Kloop.
Xabar berilishicha, ular 1-may kuni mahalliy vaqt bilan 20:00 da qo‘yib yuborilgan. Shundan keyin ular darhol tibbiy ko‘rikdan o‘tkazish uchun Laylak tuman oilaviy tibbiyot markaziga yuborilgan. Ularning to‘qqiz nafari kasalxonaga yotqizilgan.
“Ular dubinkalar bilan do‘pposlanganga o‘xshaydi, chunki ko‘pchiligida gematomalar bor. Tuni bilan ular tahqirlangan ekan. Bemorlarning ahvoli o‘rtacha og‘ir deb baholanmoqda”, — degan sog‘liqni saqlash vaziri Alimqodir Beyshenaliyev.
Muassasa ma’lum qilishicha, asirlarni ozod qilish bo‘yicha muzokaralar hukumatning Botken tumanidagi muxtor vakili Omurbek Suvanaliyev va Tojikistonning So‘g‘d viloyati rahbari Rajabboy Ahmadzod tomonidan olib borilgan.
Muxtor vakillik ma’lumotlariga qaraganda, ozod etilganlar orasida Internatsional qishlog‘i rahbari Mirzabek Jumaboyev ham bor.
Qirg‘iz-tojik chegarasidagi qurolli nizo 28—29-aprel kunlari boshlandi. Bunga “Golovnoy” suv taqsimlash punktida olib borilgan ishlar sabab bo‘ldi.
Qirg‘iziston Sog‘liqni saqlash vazirligi ma’lumotlariga ko‘ra, 1-may 18:00 holatiga 34 nafar qirg‘izistonlik halok bo‘lgan, 173 kishi jabrlangan. Shularning 121 nafari oddiy fuqarolar, 31 nafari harbiylar va bir kishi tibbiyot xodimidir.
Nizo hududidan 27 358 nafar Qirg‘iziston fuqarosi evakuatsiya qilingan, ular orasida 15 505 nafari — bolalar. Shuningdek, o‘nga yaqin qishloq zarar ko‘rdi, uylar va boshqa obyektlar yonib ketdi.
Tojikiston tomoni shu paytgacha jabrlanganlar haqida rasman ma’lum qilgani yo‘q. OAVlarga ko‘ra, nizoda kamida 8 kishi halok bo‘lib, 90 kishi yaralangan.
Qirg‘iziston chegara xizmati ma’lumotlariga ko‘ra, 2-may 9:30 holatiga qirg‘iz-tojik chegarasidagi vaziyat barqaror deb baholanmoqda.
Izoh (0)