“Al-Qoida” terrorchilik tashkiloti AQShga “har tomondan hujum qilish” bilan keng ko‘lamli urush va’da qildi. Bu haqda guruhning ikki vakili CNN telekanaliga vositachi orqali xabar bergan.
Terrorchi tashkilot vakillarining so‘zlariga ko‘ra, Amerikaga qarshi kurash “AQSh butun islom dunyosidan chiqarib yuborilgunga qadar” davom etadi. Telekanalning ta’kidlashicha, “Al-Qoida” odatda ommaviy axborot vositalari bilan aloqa o‘rnatishdan bosh tortgan va tashviqot uchun o‘z resurslaridan foydalanib kelgan. Terrorizm bo‘yicha mutaxassis Pol Kruikshank CNN telekanaliga bergan intervyusida terrorchilik guruhi AQSh prezidenti Jo Baydenning AQSh qo‘shinlarini Afg‘onistondan olib chiqish to‘g‘risidagi qaroridan “ilhomlangan” yoki “yaqinda yuz bergan ko‘p sonli talafotlardan e’tiborni chalg‘itmoqchi bo‘lgan” bo‘lishi mumkin degan fikrni ilgari surdi.
“Bundan tashqari, ‘Al-Qoida’ tashkiloti ‘Tolibon’ harakati Vashingtonga terrorchilik guruhi bilan aloqalarni uzish haqida bergan va’dasida samimiy emasligini aytdi, demak Amerika qo‘shinlarini Afg‘onistondan olib chiqish to‘g‘risidagi bitim aldovga asoslangan”, — deydi CNN.
“Al-Qoida”ning bunday bayonoti tashkilot asoschisi Usama bin Laden vafotining 10 yilligi arafasida berildi. 2011-yil 2-mayga o‘tar kechasi AQSh dengiz floti askarlari Pokistonning Abbotobod shahridagi bin Ladenning qasriga bostirib kirgan. “Al-Qoida” rahbari bilan birgalikda uning o‘g‘li va uchta sherigi o‘ldirilgan.
Avvalroq AQSh davlat kotibi Entoni Blinken CNN nashriga bergan intervyusida hech kim Afg‘onistonda fuqarolar urushining qayta boshlanishidan manfaatdor emasligi, biroq ushbu ssenariyning ehtimoli mavjudligi haqida gapirgan edi.
Eslatib o‘tamiz, AQSh prezidenti Jo Bayden aprel o‘rtalarida 1-maydan boshlab Vashingtonning Afg‘onistondagi qo‘shinlari mamlakat hududidan chiqib ketishini e’lon qildi. Ushbu jarayon 11-sentabrgacha ya’ni “Al-Qoida” terrorchilik tashkilotining Jahon savdo markazi va Pentagonga uyushtirgan hujumlariga 20 yil to‘ladigan kunda tugaydi. AQShning ortidan NATO, Gruziya, Bolgariya ham qo‘shinlarini Afg‘onistondan olib chiqib ketishini bildirdi.
Baydenning mazkur qaroriga AQSh sobiq prezidenti Donald Tramp munosabat bildirgan va Afg‘onistondan qo‘shinlarni olib ketishda 11-sentabrdan foydalanmaslik, harbiylarni tezroq qaytarish imkoniyatini ko‘rib chiqish mumkinligi haqida tanqidiy fikr bildirgan.
Izoh (0)