Germaniya va Niderlandiya harbiylaridan iborat NATO korpusi Estoniyaga joylashtirilishi mumkin. Bu haqda mahalliy ERR telekompaniyasi xabar berdi.
Estoniya mudofaa vaziri Xanno Pevkur ma’lumotni tasdiqlagan, harbiylar Pyarnu shahriga joylashtirilishi kutilmoqda. Yakuniy qaror 2025-yil davomida qabul qilinishi kerak.
Bu nafaqat qo‘mondonlik vazifalarini bajarayotgan ittifoqdoshlarga, balki estoniyalik harbiylarga, jumladan, harbiy xizmatni o‘tayotganlarga ham taalluqli bo‘ladi, dedi Pevkur.
U bu qarorni mamlakat mudofaa kuchlari uchun “strategik ahamiyatga ega qadam” deb atadi. Vazirning ta’kidlashicha, Estoniyada ittifoqdoshlar korpusini joylashtirish rejalashtirilayotgani sababli 200 nafar harbiy uchun zarur infratuzilma quriladi. Ushbu loyihaga 17 million yevro ajratilishi rejalashtirilgan.
Pyarnu shahri logistika rivojlangani sababli maqbul variant sifatida ko‘rilmoqda. Uning yonida port, aerodrom, temiryo‘l, shosse mavjud va aholi punkti Latviya poytaxti Rigaga yaqin joylashgan. Estoniya 2004-yildan beri NATO a’zosi hisoblanadi.
Germaniya allaqachon Litvada harbiy brigadasini joylashtirgan
Boltiqbo‘yining yana bir davlati — Litvada NATOning sharqiy qanotini mustahkamlash uchun Germaniya qurolli kuchlari brigadasi rasman doimiy ravishda joylashtirilgan. 5000 ming nafar harbiy 2027-yil oxirigacha to‘liq jangovar holatga keltirilishi rejalashtirilgan.
Brigada Rudninkay qishlog‘ida qurilishi kutilayotgan yangi harbiy kompleksga joylashtiriladi. Ungacha harbiy xizmatchilar vaqtinchalik bazalarda qoladi. Ayni paytda Litvada faqat 150 nafar Bundesver harbiy xizmatchisi bor. 2024-yil avgustida Litva Mudofaa vazirligi Rudninkayda mamlakat tarixidagi “eng yirik harbiy infratuzilma” qurilishi boshlanganini ma’lum qilgan. Harbiy shaharchaning umumiy maydoni 170 gektarni tashkil etadi.
Izoh (0)