Janubiy koreyalik hujumchi Son Hyon Min faoliyatini AQShning “Los-Anjeles” klubida davom ettirishga yaqin turibdi. Bu haqda insayder Fabrisio Romano ma’lumotiga tayanib, Championat nashri xabar berdi.
Manbaga ko‘ra, tomonlar shartnoma bo‘yicha kelishuvga erishgan. Yaqin kunlarda 33 yoshli futbolchining AQSh klubi bilan rasmiy bitim imzolashi kutilmoqda. Son Hyon Min 3-avgust, yakshanba kuni “Tottenhem” safidagi so‘nggi uchrashuvini “Nyukasl”ga qarshi o‘tkazgan va shundan so‘ng “shporlar” lageriga qaytmagan. Ayni paytda u AQSh klubidan rasmiy hujjatlarni kutmoqda.
Eslatib o‘tamiz, Son yaqinda “Tottenhem”ni tark etishini rasman e’lon qilgan edi. U 2015-yilda Germaniyaning “Bayer” klubidan 30 million yevro evaziga London klubiga qo‘shilgan. O‘tgan davr mobaynida u “shporlar” safida jami 454 o‘yinda maydonga tushib, o‘z hisobiga 173 ta gol va 101 ta golli uzatma yozdirib qo‘ygan. U so‘nggi mavsum jamoa bilan Yevropa Ligasi g‘olibligini qo‘lga kiritdi.
Izoh (0)