Қирғизистон ҳукуматининг Боткен вилоятидаги мухтор вакили маълум қилишича, Тожикистон Лайлак туманидаги Интернационал қишлоғининг ўн нафар аҳолисини озод этган, улар 30 апрель куни гаровга олинган эди, деб ёзади Kloop.
Хабар берилишича, улар 1 май куни маҳаллий вақт билан 20:00 да қўйиб юборилган. Шундан кейин улар дарҳол тиббий кўрикдан ўтказиш учун Лайлак туман оилавий тиббиёт марказига юборилган. Уларнинг тўққиз нафари касалхонага ётқизилган.
«Улар дубинкалар билан дўппосланганга ўхшайди, чунки кўпчилигида гематомалар бор. Туни билан улар таҳқирланган экан. Беморларнинг аҳволи ўртача оғир деб баҳоланмоқда», — деган соғлиқни сақлаш вазири Алимқодир Бейшеналиев.
Муассаса маълум қилишича, асирларни озод қилиш бўйича музокаралар ҳукуматнинг Боткен туманидаги мухтор вакили Омурбек Суваналиев ва Тожикистоннинг Сўғд вилояти раҳбари Ражаббой Аҳмадзод томонидан олиб борилган.
Мухтор вакиллик маълумотларига қараганда, озод этилганлар орасида Интернационал қишлоғи раҳбари Мирзабек Жумабоев ҳам бор.
Қирғиз-тожик чегарасидаги қуролли низо 28—29 апрель кунлари бошланди. Бунга «Головной» сув тақсимлаш пунктида олиб борилган ишлар сабаб бўлди.
Қирғизистон Соғлиқни сақлаш вазирлиги маълумотларига кўра, 1 май 18:00 ҳолатига 34 нафар қирғизистонлик ҳалок бўлган, 173 киши жабрланган. Шуларнинг 121 нафари оддий фуқаролар, 31 нафари ҳарбийлар ва бир киши тиббиёт ходимидир.
Низо ҳудудидан 27 358 нафар Қирғизистон фуқароси эвакуация қилинган, улар орасида 15 505 нафари — болалар. Шунингдек, ўнга яқин қишлоқ зарар кўрди, уйлар ва бошқа объектлар ёниб кетди.
Тожикистон томони шу пайтгача жабрланганлар ҳақида расман маълум қилгани йўқ. ОАВларга кўра, низода камида 8 киши ҳалок бўлиб, 90 киши яраланган.
Қирғизистон чегара хизмати маълумотларига кўра, 2 май 9:30 ҳолатига қирғиз-тожик чегарасидаги вазият барқарор деб баҳоланмоқда.
Изоҳ (0)