Farg‘ona viloyatining Qo‘qon shahrida xalqaro terroristik tashkilot tarafdori bo‘lgan shaxs 6 yilga ozodlikdan mahrum etildi. Bu haqda Davlat xavfsizlik xizmati xabar berdi.
Ma’lum qilinishicha, Qo‘qon shahrida yashovchi shaxs 2021-yilda Telegram’da kanal ochib, unga aqidaparastlik g‘oyalari bilan yo‘g‘rilgan materiallarni joylab, kanalning 9 nafar obunachisiga tarqatadi. Bundan tashqari u Instagram’da hozirgi kunda Suriya davlatida faoliyat olib borayotgan “Tavxid va jihod katibasi” xalqaro terroristik tashkilotining instruktur va media targ‘ibotchisi bilan bog‘lanib, uning da’vatlari ta’siriga tushgan. So‘ngra Suriyaga jihod qilish uchun nima qilish kerakligi to‘g‘risida o‘zaro audio va xabar orqali yozishmalar olib borib, xalqaro terroristik tashkilot safiga qo‘shilishga xayrixohlik bildirgan.
O‘z navbatida ushbu shaxs yaqin tanishlari va o‘zining sinfdoshlari orasida “jamoat” shakllantirib, ularni Suriya hududiga “hijrat” qilib, terrorchi guruhlar qatoriga qo‘shilishga da’vat qilgan.
DXX va boshqa huquqni muhofaza qiluvchi organlar tomonidan o‘tkazilgan tezkor tadbirlar natijasida uning noqonuniy harakatlari to‘xtatib qolinib, huquqiy baho berildi.
Natijada jinoyat ishlari bo‘yicha Furqat tuman sudi tomonidan Jinoyat kodeksining 244-1-moddasi (jamoat xavfsizligi va jamoat tartibiga tahdid soladigan materiallarni tayyorlash, saqlash, tarqatish yoki namoyish etish) 3-qismi “g” bandi, 244-2-moddasi (diniy ekstremistik, separatistik, fundamentalistik yoki boshqa taqiqlangan tashkilotlar tuzish, ularga rahbarlik qilish, ularda ishtirok etish) 1-qismida nazarda tutilgan jinoyatni sodir etganlikda aybdor deb topilib, 6 yilga ozodlikdan mahrum qilish jazosi tayinlandi.
DXX bundan avval Andijon viloyatida 28 yoshli xalqaro terroristik tashkilot tarafdori 8 yil 6 oyga ozodlikdan mahrum qilinganini ma’lum qilgandi.
Izoh (0)