Жанубий Кореяга 63 нафар ўзбекистонлик ишлаш учун жўнаб кетди

Ўзбекистондан Жанубий Кореяга мавсумий ишда ишлаш учун 63 нафар фуқаро жўнаб кетди, дея хабар бермоқда «Дунё» ахборот агентлиги.

Қайд этилишича, Бандлик ва меҳнат муносабатлари вазирлиги ҳамда Жанубий Кореянинг Канвондо провинцияси, Янггу округи администрацияси ўртасида мавсумий ишчилар тўғрисида илк маротаба келишув тузилган.

Келишувга асосан 2021 йил 16–17 март кунлари Наманган вилоятида Жанубий Корея Янггу округи ҳудудида 5 ойлик мавсумий ишларда (Э-8 визаси) вақтинчалик меҳнат фаолиятини амалга ошириш истагида бўлган фуқаролар учун Корея компанияси вакиллари томонидан танлов ўтказилган эди. Шу билан бирга, 5 май куни яна 103 нафар Ўзбекистон фуқароси Жанубий Кореяга кетиши кутилмоқда.

Бугун мазкур фуқароларнинг дастлабки гуруҳи, яъни 63 нафари Тошкент халқаро аэропортидан чартер рейс орқали Кореяда 5 ойлик мавсумий ишларда вақтинчалик меҳнат фаолиятини амалга ошириш учун жўнаб кетди.

Манзилга етиб борган муҳожирлар 14 кунлик карантин учун изоляция қилинган жойларга жўнатилади. Ўзини изоляция қилиш пайтида фуқаролар барча зарур воситалар билан таъминланади.

Бундан аввал Қозоғистонда паспорт ва ойлик маошлари берилмаётган ўзбекистонлик меҳнат мигрантлари муаммолари ўрганилаётгани, Ташқи меҳнат миграцияси агентлиги Канадада ишлашни хоҳловчилар учун вакансия эълон қилгани ҳамда Ўзбекистондан январь–февраль ойларида 4000 га яқин фуқаро ишлаш учун хорижга жўнаб кетгани ҳақида хабар берилганди.