Кипр масаласида БМТ бош котиби Антониу Гутерриш томонидан бир неча ой ичида ўтказиладиган навбатдаги саммит яна самарасиз бўлади. Туркия президенти Ражаб Тоййиб Эрдўғон шундай фикрда, деб ёзади «ТАСС».
Эрдўғон бундай натижа учун айбни Кипрнинг грек томонига юклади. «Мен Кипр-грекларга ишонмайман. Улар ҳеч қачон ўзларини адолатли тутмаган», — деди Туркия раҳбари.
Саммит ҳақида гапирганда президент «Энди у 2-3 ойга қолдирилди, аммо бу сафар ҳам бирор натижага эришилишига ишонмайман, чунки кипрлик греклар ҳақиқатгўй эмас» — дея қўшимча қилди.
Женевада 27—29 апрелда анъанавий 5+1 форматида, яъни Кипрдан икки вакил ҳамда Кипр хавфсизлигига кафил давлатлар Греция, Туркия ва Буюк Британия ташқи ишлар вазирлари ва шахсан БМТ бош котиби иштирокида бўлиб ўтган Кипр келишуви бўйича уч кунлик конференцияда томонларнинг позициялари бир-бирига мос келмади.
Кипр-турк делегацияси музокаралар жараёнини тиклашнинг дастлабки шарти сифатида оролда икки давлат мавжудлигини тан олиш талабини илгари сурди, бу эса БМТ Хавфсизлик Кенгаши қарорларининг қоидаларига зиддир. Қоидага кўра, Кипрда икки зонали ва икки жамоали федерация тузилиши керак.
Кипр-грек томон эса ушбу асосий халқаро ҳужжатга қатъий риоя қилишни талаб қилди.
29 апрель куни саммит якунланганини эълон қилган Гутерриш Женевада томонлар Кипр келишуви бўйича жамоалараро мулоқотни тиклаш учун етарли муносабатни билдирмаганини айтди. Шу билан бирга, улар икки ёки уч ой ичида бўлиб ўтиши мумкин бўлган янги саммитни ўтказиш тўғрисида келишувга эришди.
Шу тариқа, Женева конференцияси томонларнинг беҳуда якунланган иккинчи учрашувига айланди: худди шу ҳолат 2017 йилда Швейцариянинг Кран-Монтана чанғи курортида Кипр муаммосини ҳал қилиш бўйича ўтказилган саммитда ҳам рўй берган эди.
Мавзуга доир:
Изоҳ (0)