“O‘zbektelekom” AK xalqaro paketli kommutatsiya markazining o‘tkazuvchanlik qobiliyatini kengaytirilib, internet tezligi 1800 Gbit/soniyaga yetkaziladi. Loyihaning texnik-iqtisodiy parametrlari Vazirlar Mahkamasining 17-apreldagi qarori bilan qabul qilingan, deb xabar beradi Norma. Hujjatda loyihani amalga oshirish muddati ko‘rsatilmagan.
Hujjatga ko‘ra, loyiha tanlovda g‘olib chiqqan AQShning Winncom Technologies kompaniyasi tomonidan amalga oshiriladi.
Loyihaning texnik-iqtisodiy asosi bo‘yicha umumiy qiymati 25,9 million dollarni tashkil etadi. Jumladan:
- “O‘zbektelekom” AK BNG va DPI qurilmalarining o‘tkazuvchanlik qobiliyatini kengaytirish uchun — 4,97 million dollar:
- “O‘zbektelekom” AK ma’lumotlar uzatish tarmog‘ining o‘tkazuvchanlik qobiliyatini kengaytirish uchun — 4,99 million dollar;
- “O‘zbektelekom” AK xalqaro paketli kommutatsiya markazini o‘tkazuvchanlik qobiliyatini kengaytirish uchun — 4,98 million dollar;
- “O‘zbektelekom” AK ma’lumotlar uzatish yadro tarmog‘ida xizmatlar ko‘rsatishning o‘tkazuvchanlik qobiliyatini kengaytirish uchun — 4,99 million dollarlik mashina va uskunalar xarid qilinishi ma’lumot uchun qabul qilindi.
Eslatib o‘tamiz, O‘zbekistonda internet kanalni kengaytirish ishlari so‘nggi bor 2018-yilda amalga oshirilgan edi — 110 dan 1200 Gbit/soniyaga. 2020-yilda esa kanalni 3000 Gbit/s. gacha yetkazish rejalashtirilgandi. Biroq O‘zbekistonda 2020-yilda tashqi internet kanalni kengaytirishga erishilmagan.
Izoh (0)