Yevropada 2021-yil pandemiya sharoitida keng omma uchun o‘tkazilgan ilk rok-konsertlardan biri koronavirusning yangi o‘chog‘iga aylanmadi, deb ma’lum qildi epidemiologlar. Tomoshabinlar virusga qarshi emlanmagan va ijtimoiy masofaga rioya qilmagan, lekin konsert oldidan test topshirgan va FFP2 respiratorlarini taqib olgan. Bu haqda “Interfaks” xabar berdi.
Tadqiqot natijalari Barselonadagi Germans Trias i Pujol universiteti shifoxonasining shifokorlari tomonidan taqdim etildi, deb yozmoqda Euronews. Ular 27-mart kuni Palau Sant Jordi sport arenasida 5 ming tomoshabin ishtirokida bo‘lib o‘tgan konsertning natijalarini tahlil qildi.
Tomoshabinlar koronavirusga qarshi emlanmagan edi. Konsertdan oldin ular virusga ekspress-test topshirgan va faqat natijasi manfiy chiqqanlar uchun konsertga kirishga ruxsat berilgan. Tomoshabinlardan ijtimoiy masofani saqlash talab etilmagan. Tadbir tashkilotchilari konsert zalini mukammal shamollatish tizimi, shuningdek, hojatxona va barlarni maxsus dezinfeksiya qilish choralari bilan ta’minlagan.
https://twitter.com/KashPrime/status/1387034780018020357
Ikki hafta o‘tgach tomoshabinlarning olti nafarida koronavirus aniqlangan, lekin tadqiqotchilar bunga konsert sababchi bo‘lmaganiga ishonmoqda. Yana ikki kishida COVID-19 tasdiqlanmagan.
Tadqiqot mualliflarining fikriga ko‘ra, yopiq binolarda tegishli himoya choralari va to‘g‘ri shamollatish tizimi yordamida jonli rok-konsertini tashkil etish xavfsiz ekani tasdiqlandi. Ular konsert zalida infeksiya yuqishi alomatlarini aniqlamadi.
Ma’lumot uchun, Ispaniyaning Pamplona shahri rahbari Enrike Mayya koronavirus pandemiyasi sababli ketma-ket ikkinchi yil San-Fermin festivalini bekor qildi. Uning ta’kidlashicha, bu qaror koronavirus tarqalishining yuqori xavfi va mintaqadagi vaksinatsiyaning past darajasi bilan bog‘liq.
San-Fermin Pamplonada har yili 6—14-iyun kunlari o‘tkaziladigan festival bo‘lib, marosim 6-iyunda, avliyo Fermin kunining yarmida boshlanadi. Bayram, birinchi navbatda, ensyerro (12 bosh quturgan buqadan qochish) tufayli mashhur hisoblanadi.
Avvalroq Ispaniyaning Malyorka orolidagi Manakor shahri politsiyasi 22 kishiga koronavirus yuqtirishda gumonlangan 40 yoshli fuqaroni qo‘lga olganini ma’lum qildi. U 8 kishiga bevosita, 14 kishiga bilvosita koronavirus yuqtirgan, kasallanganlar orasida uch nafar chaqaloq ham borligi aytilmoqda.
Shuningdek, Bloomberg agentligi koronavirus pandemiyasiga qarshi eng samarali kurash olib borayotgan mamlakatlar reytingida Singapur yetakchilik qilayotganini aytdi. 2021-yilning aprel oyida Singapur mamlakatda vaksinatsiya sur’atining tezligi sababli reytingda Yangi Zelandiyani ortda qoldirib, birinchi o‘rinni egalladi.
Izoh (0)