Rossiya Ukraina chegaralaridan qo‘shinlarini qisman — faqat Qrimdan olib chiqishni boshladi, ammo sharqiy chegaralar yaqinida, masalan, Voronej viloyatida harbiylar hali chekinmagan. Bu haqda Ukraina Davlat chegara xizmati rahbari Sergiy Deyneko ma’lum qildi, deb yozadi “RBK”.
“Rossiya mudofaa vaziri Sergey Shoygu 23-apreldan Rossiya qo‘mondonligi qo‘shinlarni olib chiqishni boshlashi to‘g‘risida e’lon qilganidan so‘ng bizning razvedkamiz bu jarayon qisman boshlanganini kuzatmoqda. Ayni paytda ushbu jarayon vaqtincha bosib olingan Qrim hududida amalga oshirilayotganini ko‘ryapmiz”, — dedi u.
Deynekoning so‘zlariga ko‘ra, Ukrainaning sharqiy chegaralaridagi qo‘shinlar haligacha chekinmagan. Xususan, Voronej viloyatidagi dala lagerlari o‘z joyida qolmoqda.
Deyneko Rossiya o‘z qo‘shinlarini Ukraina chegaralaridan olib ketadi, deyishga hali ertaligini aytdi.
Mudofaa vaziri Sergey Shoygu 22-aprel kuni janubiy chegaralardagi mashg‘ulotlardan so‘ng Rossiya qo‘shinlarini doimiy joylariga qaytarish to‘g‘risida buyruq berdi. Qo‘shinlarni olib chiqish 23-aprelda boshlandi, jarayon 1-mayga qadar yakunlanishi kerak.
Ukraina prezidenti Vladimir Zelenskiy Rossiya qo‘shinlari olib chiqib ketilgandan keyin chegarada keskinlik pasayishini aytdi.
22-aprel kuni Qrimdagi Opuk poligonida Shoygu boshchiligida Janubiy harbiy okrug kuchlari va havo-desant kuchlari mashg‘ulotlarining asosiy bosqichi bo‘lib o‘tgan edi. Mashg‘ulotlarda 10 mingdan ortiq askar, 1200 ta qurol va harbiy texnika, shuningdek, 40 dan ortiq harbiy kema ishtirok etgan.
Wall Street Journal (WSJ) gazetasi Rossiyaning Qrim va Voronej viloyatidagi harbiy texnikalarining sun’iy yo‘ldoshdan olingan suratlarini chop etdi.
Avvalroq Fransiya prezidenti Emmanuel Makron, Germaniya kansleri Angela Merkel va Ukraina prezidenti Vladimir Zelenskiy Donbassdagi mojaroning avj olishiga yo‘l qo‘ymaslik uchun Rossiya o‘z qo‘shinlarini Ukraina bilan chegaradan olib ketishi kerakligini aytgandi.
Shuningdek, Bayden va Angela Merkel Rossiyani Ukraina bilan chegaradagi qo‘shinlarini olib ketishga chaqirgan edi. Ungacha Rossiya Ukraina chegarasiga va Qrimga 40 ming nafardan askar jo‘natgani haqida xabar berilgan. Ukraina prezidenti Vladimir Zelenskiy Rossiyani “jilovlash”da Baydendan yordam so‘ragan. Kreml esa Rossiya va Ukraina o‘rtasidagi urush ehtimolini istisno qilgan.
Izoh (0)