Rossiya Tashqi ishlar vazirligi 28-aprel kuni Boltiqbo‘yi davlatlarining elchilarini chaqirib, ilgari rossiyalik diplomatlarning Boltiqbo‘yi mamlakatlaridan chiqarib yuborilgani munosabati bilan javob choralarini e’lon qildi. Bu haqda Tashqi ishlar vazirligiga tayanib “RBK” xabar berdi.
Vazirlikda Boltiqbo‘yi davlatlari elchilariga rossiyalik “xodimlarni haydab chiqarish bo‘yicha provokatsion, asossiz harakatlar bilan bog‘liq” keskin norozilik bildirilgan.
Rossiya Litva elchixonasining ikki xodimini, shuningdek, Latviya va Estoniya elchixonalarining bir nafardan xodimini yetti kun ichida mamlakatni tark etishga buyurdi.
Shuningdek, Moskvadagi Slovakiya elchisi ham Tashqi ishlar vazirligiga chaqirildi.
“Slovakiya tomonidan Bratislavadagi Rossiya elchixonasining uch nafar xodimiga noqonuniy faoliyat yuritishi to‘g‘risida assosiz ravishda absurd va soxta ayblov e’lon qilingani munosabati bilan Slovakiya elchisi qattiq norozilik oldi”, — deyiladi TIV xabarida.
TIV bayonotida Slovakiya hukumatining xatti-harakatlari “Chexiya bilan yolg‘on birdamlikni namoyish etish to‘g‘risidagi” qaror deb nomlangan.
Moskva Slovakiya elchixonasining uch nafar xodimini persona non grata deb e’lon qildi. Ular 5-mayga qadar mamlakatdan chiqib ketishi kerak.
Avvalroq Chexiya Yevroittifoq va NATOdan birdamlik belgisi sifatida Rossiya razvedkachilarini o‘z mamlakatlaridagi elchixonalardan chiqarib yuborishni so‘ragan edi. “Biz Rossiya razvedka xodimlarining umumiy deportatsiyasiga qaratilgan jamoaviy harakatlarga chaqiramiz”, — degan edi o‘sha vaqtda tashqi ishlar vaziri vazifasini vaqtincha bajaruvchi Yan Gamachek.
23-aprel kuni Boltiqbo‘yi mamlakatlari rossiyalik diplomatlarni chiqarib yuborishi haqida ma’lum qildi: Litva Rossiya elchixonasining ikki nafar xodimini, Latviya va Estoniya bir nafardan xodimini o‘z hududidan chiqarib yuborishga qaror qildi.
Bungacha Slovakiya uch nafar rossiyalik diplomatni o‘z hududidan chiqarib yuborishga qaror qilgan edi. O‘shanda mamlakat bosh vaziri Eduard Xegerning ta’kidlashicha, Slovakiya maxsus xizmatlari ma’lumotlari o‘rganib chiqilgandan so‘ng “hozirgi paytdagi geosiyosiy ahvol, shuningdek, Chexiyadagi vaziyat sababli” shunday qaror qabul qilingan.
Chexiya Rossiyani 2014-yil 17-aprelda Moraviyaning janubi-g‘arbiy qismidagi o‘q-dorilar omborida sodir bo‘lgan portlashlarga aloqadorlikda ayblaganidan keyin ular o‘rtasidagi keng ko‘lamli siyosiy-diplomatik nizo paydo bo‘ldi. Shundan so‘ng Praga qiymati 6 milliard yevro bo‘lgan “Dukovani” atom elektr stantsiyasining yangi energiya blokini qurish bo‘yicha tenderda ishtirok etish uchun “Rosatom” davlat korporatsiyasining nomzodlar safidan chiqarilishini e’lon qildi.
Buning ortidan Chexiya 18 nafar rossiyalik diplomatni mamlakatdan chiqarib yubordi. Bunga javoban Moskva ham 20 nafar chexiyalik diplomatni mamakatdan chiqarib yubordi. 22-aprel kuni Chexiya tashqi ishlar vaziri Pragada rossiyalik diplomatlar sonining cheklanishi haqida ma’lum qildi: ularning soni Moskvadagi Chexiya diplomatik vakolatxonasining xodimlari soni (7 kishi) bilan tenglashtiriladi. Elchixona xodimlarining mamlakatni may oyining oxirigacha tark etishi belgilangan.
Izoh (0)