Bloomberg agentligining koronavirus pandemiyasiga qarshi eng samarali kurash olib borayotgan mamlakatlar reytingida Singapur yetakchilik qilmoqda, deb xabar berdi Meduza.

Foto: Google Images

Bu reyting 2020-yilning noyabr oyida tuzilgan bo‘lib, har oyda yangilanib boradi. Reyting qaysi mamlakatlar eng kam ijtimoiy va iqtisodiy asoratlar bilan pandemiyaga qarshi samarali kurashayotganini ko‘rsatadi.

Reytingdan iqtisodiyot hajmi bo‘yicha dunyodagi eng yirik 53 ta mamlakat joy olgan. Bloomberg ulardagi koronavirus bilan bog‘liq vaziyatni 10 ta parametr bo‘yicha tahlil qiladi, bu parametrlar kasallanish va o‘lim darajasi, testlar va vaksinatsiya surati, shuningdek, harakatlanish erkinligini o‘z ichiga oladi.

2021-yilning aprel oyida Singapur mamlakatda vaksinatsiya sur’atining tezligi sababli reytingda Yangi Zelandiyani ortda qoldirib, birinchi o‘rinni egalladi.

Yangi Zelandiya esa ikkinchi pog‘onaga tushib qoldi. Shuningdek, Avstraliya uchinchi, Isroil to‘rtinchi, Tayvan beshinchi o‘rinni band etdi. Reytingning oxirgi uch pog‘onasini Argentina, Polsha va Braziliya egalladi.

Ma’lumot uchun, Isroilda oxirgi ikkita koronavirusdan davolanish bo‘limi ham yopildi, bemorlar esa davolanish uchun statsionar bo‘limlarga o‘tkazildi. Mamlakatda koronavirusga chalinganlarni davolovchi bo‘limlar bir necha hafta oldin yopila boshlagan edi.

Avvalroq Janubiy Koreyaning koronavirusga qarshi immunitetni oshiruvchi, achitilgan karam, tuz va achchiq qalampirdan tayyorlanadigan milliy taomining eksport hajmi 2021-yilning boshida rekord darajada o‘sgani ma’lum bo‘ldi. 2021-yilning yanvar oyidan mart oyigacha mamlakatda koreyscha kimchini yetkazib berish hajmi 46,57 million dollarni tashkil qildi.

Shuningdek, Yaponiyada koronavirus pandemiyasi sharoitida yolg‘izlik vaziri lavozimi joriy etildi. Yaponiya bosh vaziri Yosixide Suganing ta’kidlashicha, zamonaviy dunyoda jamiyatdagi odamlar o‘rtasidagi aloqalar allaqachon zaiflashgan va koronavirus pandemiyasi ularning aloqalarini yanada cheklab qo‘ygan.