AQShning sobiq prezidenti Donald Tramp Fox News telekanaliga bergan intervyusida Twitter ijtimoiy tarmog‘ini zerikarli deb atadi. Bu haqda “Korrespondent.net” xabar berdi.
“Twitter juda zerikarli bo‘lib qoldi. Ko‘pchilik tarmoqni tark etmoqda”, — dedi Tramp.
Sobiq prezidentning so‘zlariga ko‘ra, ijtimoiy tarmoq uning sahifasini bloklab qo‘yganidan keyin u o‘z bayonotlarini press-relizlar orqali tarqatmoqda va bu “ancha muqobil” usul hisoblanadi.
Shuningdek, Tramp texnologiya kompaniyalari monopoliyaga qarshi kurashishi kerakligini ta’kidlab, ularni tanqid qildi.
Ma’lumot uchun, 6-yanvar kuni Trampning tarafdorlari prezidentlik saylovlarining yakuniy natijalari bo‘yicha AQSh Kongressining qo‘shma majlisi bo‘lib o‘tayotgan Kapitoliy binosiga hujum uyushtirganidan keyin, Twitter 8-yanvar kuni uning akkauntini bir umrga bloklab qo‘ygan edi.
Shuningdek, YouTube videoservisi Donald Trampning kanalini kamida bir haftaga bloklab qo‘ydi. Unga qadar sobiq prezidentning Facebook, Instagram akkauntlari bloklangan edi. Ushbu ijtimoiy tarmoqlar rahbariyatining so‘zlariga ko‘ra, AQShning amaldagi prezidenti postlari platformalarning zo‘ravonlik harakatlarini qo‘zg‘atish to‘g‘risidagi qoidalarini buzgan.
Keyinchalik Tramp o‘z tarafdorlarini tinchlanishga chaqirgan, shu bilan birga, u “saylovlarning soxtalashtirilgani” va “ularning dardi”ni tushunishini ta’kidlashda davom etgan.
6-yanvar voqealaridan keyin Kongress zo‘ravonlikni qo‘zg‘atgani uchun o‘sha paytdagi prezident Trampga impichment e’lon qilishni boshladi. Impichmentni ko‘rib chiqish Jo Baydenning prezidentlik lavozimini egallaganidan keyin bo‘lib o‘tdi. Unda AQSh Senati Tramning impichmentiga qarshi ovoz berdi.
Izoh (0)