AQShda 6-yanvar kuni bo‘lib o‘tgan shturmdan keyin Kapitoliyni ta’mirlash uchun 30 million dollar talab etiladi. Kongress binosida tarixiy haykallar va freskalarga zarar yetgan. Bu haqda Kapitoliy arxitektori Brett Blentonga tayanib CBS News xabar berdi.

Foto: Reuters

“Haykallar, freskalar, tarixiy o‘rindiqlar va asl nusxadagi deraza romlari har xil darajada zarar ko‘rgan”, — dedi Blenton kongress vakillari palatasining yig‘ilishida.

Uning ta’kidlashicha, asosiy zarar qalampir purkagich va boshqa kimyoviy birikmalardan foydalanish natijasida, shuningdek, yong‘inga qarshi vositalardan foydalanish natijasida yuzaga kelgan.

Kongress quyi palatasining qonun chiqaruvchilari kerakli mablag‘ ajratilishini ma’qullagan. Lekin Blentonning aytishicha, ta’mirlash ishlariga bundan ham ko‘proq mablag‘ talab etilishi mumkin.

Shuningdek, bu pul singan oynalarni, eshik parchalarini, graffitilarni tozalash va kongress xavfsizligini ta’minlash uchun kerak bo‘ladi.

Ma’lumot uchun, Donald Trampni qo‘llab-quvvatlovchilar tomonidan tashkil etilgan “Amerikani qutqarish marshi” nomli norozilik namoyishi ishtirokchilari 6-yanvar kuni poytaxt Vashingtondagi Kapitoliy binosiga bostirib kirgan edi. Trampni qo‘llab-quvvatlash uchun uyushtirilgan namoyish Kapitoliy shturmi bilan tugagan. To‘rt kishi halok bo‘lib, yana bir necha kishi tan jarohati olgan. Politsiya xodimlaridan biri voqea qurboniga aylangan.