АҚШнинг собиқ президенти Дональд Трамп Fox News телеканалига берган интервьюсида Twitter ижтимоий тармоғини зерикарли деб атади. Бу ҳақда «Korrespondent.net» хабар берди.
«Twitter жуда зерикарли бўлиб қолди. Кўпчилик тармоқни тарк этмоқда», — деди Трамп.
Собиқ президентнинг сўзларига кўра, ижтимоий тармоқ унинг саҳифасини блоклаб қўйганидан кейин у ўз баёнотларини пресс-релизлар орқали тарқатмоқда ва бу «анча муқобил» усул ҳисобланади.
Шунингдек, Трамп технология компаниялари монополияга қарши курашиши кераклигини таъкидлаб, уларни танқид қилди.
Маълумот учун, 6 январь куни Трампнинг тарафдорлари президентлик сайловларининг якуний натижалари бўйича АҚШ Конгрессининг қўшма мажлиси бўлиб ўтаётган Капитолий биносига ҳужум уюштирганидан кейин, Twitter 8 январь куни унинг аккаунтини бир умрга блоклаб қўйган эди.
Шунингдек, YouTube видеосервиси Дональд Трампнинг каналини камида бир ҳафтага блоклаб қўйди. Унга қадар собиқ президентнинг Facebook, Instagram аккаунтлари блокланган эди. Ушбу ижтимоий тармоқлар раҳбариятининг сўзларига кўра, АҚШнинг амалдаги президенти постлари платформаларнинг зўравонлик ҳаракатларини қўзғатиш тўғрисидаги қоидаларини бузган.
Кейинчалик Трамп ўз тарафдорларини тинчланишга чақирган, шу билан бирга, у «сайловларнинг сохталаштирилгани» ва «уларнинг дарди»ни тушунишини таъкидлашда давом этган.
6 январь воқеаларидан кейин Конгресс зўравонликни қўзғатгани учун ўша пайтдаги президент Трампга импичмент эълон қилишни бошлади. Импичментни кўриб чиқиш Жо Байденнинг президентлик лавозимини эгаллаганидан кейин бўлиб ўтди. Унда АҚШ Сенати Трамнинг импичментига қарши овоз берди.
Изоҳ (0)