Bangkokda 26-apreldan boshlab hamma joyda tibbiy niqob taqish tartibi joriy qilindi. Bu tartibni buzgani uchun Tailand bosh vaziri Prayut Chan-Ocha birinchilardan bo‘lib jarimaga tortildi, deb yozmoqda The Bangkok Post.
Bosh vazir vaksinalar sotib olish masalasida o‘tkazilgan majlisda tibbiy niqobsiz ishtirok etdi. Bangkok gubernatori Asvin Kvanmuang o‘zining Facebook sahifasida “bosh vazirga qoidalarni buzgani haqida xabar qilgan”ini aytdi. Natijada amaldor 6000 bat (190 dollar) miqdorida jarimaga torildi.
Gubernator ijtimoiy tarmoqdagi ushbu postini joylashdan oldin Chan-Ocha o‘z sahifasiga niqobsiz holda majlisda qatnashgani tasvirlangan fotosuratni joylagan edi. Lekin keyinroq u surat o‘chirildi.
Worldometers’ning so‘nggi ma’lumotlariga ko‘ra, pandemiya boshidan buyon Tailandda koronavirus bilan bog‘liq 57 508 ta holat ro‘yxatga olindi, 148 nafar bemor koronavirus qurboniga aylandi.
Avvalroq Ruminiya sog‘liqni saqlash vaziri Vlad Voykulesku tibbiy niqob taqmagani uchun 1,5 ming ley (360 dollar) miqdorida jarimaga tortilgan edi. Ma’lumotlarga ko‘ra, 29-mart kuni jurnalistlar vazirni parlament vestibyulida boshqalar bilan tibbiy niqobini yechgan holda muloqot qilayotganida suratga tushirgan. Vazirning ta’kidlashicha, u niqobini chanqoq sababli yechgan.
Shuningdek, Gruziyada rossiyalik jurnalist Vladimir Pozner va uning mehmonlari izolyatsiya va karantin qoidalarini buzgani uchun jarimaga tortildi. Mamlakatda izolyatsiya va karantin qoidalarini buzganlik uchun jarima qonunga muvofiq 2 ming larini (600 dollar atrofida) tashkil qiladi.
Izoh (0)