Бангкокда 26 апрелдан бошлаб ҳамма жойда тиббий ниқоб тақиш тартиби жорий қилинди. Бу тартибни бузгани учун Таиланд бош вазири Прают Чан-Оча биринчилардан бўлиб жаримага тортилди, деб ёзмоқда The Bangkok Post.
Бош вазир вакциналар сотиб олиш масаласида ўтказилган мажлисда тиббий ниқобсиз иштирок этди. Бангкок губернатори Асвин Кванмуанг ўзининг Facebook саҳифасида «бош вазирга қоидаларни бузгани ҳақида хабар қилган»ини айтди. Натижада амалдор 6000 бат (190 доллар) миқдорида жаримага торилди.
Губернатор ижтимоий тармоқдаги ушбу постини жойлашдан олдин Чан-Оча ўз саҳифасига ниқобсиз ҳолда мажлисда қатнашгани тасвирланган фотосуратни жойлаган эди. Лекин кейинроқ у сурат ўчирилди.
Worldometers’нинг сўнгги маълумотларига кўра, пандемия бошидан буён Таиландда коронавирус билан боғлиқ 57 508 та ҳолат рўйхатга олинди, 148 нафар бемор коронавирус қурбонига айланди.
Аввалроқ Руминия соғлиқни сақлаш вазири Влад Войкулеску тиббий ниқоб тақмагани учун 1,5 минг лей (360 доллар) миқдорида жаримага тортилган эди. Маълумотларга кўра, 29 март куни журналистлар вазирни парламент вестибюлида бошқалар билан тиббий ниқобини ечган ҳолда мулоқот қилаётганида суратга туширган. Вазирнинг таъкидлашича, у ниқобини чанқоқ сабабли ечган.
Шунингдек, Грузияда россиялик журналист Владимир Познер ва унинг меҳмонлари изоляция ва карантин қоидаларини бузгани учун жаримага тортилди. Мамлакатда изоляция ва карантин қоидаларини бузганлик учун жарима қонунга мувофиқ 2 минг ларини (600 доллар атрофида) ташкил қилади.
Изоҳ (0)