Ispaniyaning Malyorka orolidagi Manakor shahri politsiyasi 22 kishiga koronavirus yuqtirishda gumonlangan 40 yoshli fuqaroni qo‘lga olganini ma’lum qildi. U 8 kishiga bevosita, 14 kishiga bilvosita koronavirus yuqtirgan, kasallanganlar orasida uch nafar chaqaloq ham bor. 23-aprel kuni gumonlanuvchining ishi sudga oshirildi. Bu haqda Ispaniya politsiyasiga tayanib, Meduza xabar berdi.
Yanvar oyining oxirida Manakor shahrining “nomdor muassasasi”dagi xodimlardan biri “aftidan, koronavirus bilan kasallangani va buni yashirgani” oqibatida COVID-19 avj olishi haqida ma’lum bo‘lgach, tergov-surishtiruv ishlari boshlangan edi, deyiladi xabarda.
Koronavirus avj olishidan bir necha kun oldin gumonlanuvchida kasallik alomatlari paydo bo‘lgan, lekin u hamkasblari virusni yuqtirib olishdan xavotir olayotganiga qaramay, uyiga ketishni rad etgan. Ishdan keyin u koronavirusga PZR-testini topshirgan va keyingi kuni test natijalarini kutmay, yana ishiga qaytgan. Bundan tashqari, u o‘sha kuni mashg‘ulot zaliga ham borgan.
Kompaniya menejeri va hamkasblari uning uyiga ketishini talab qilgan. Tashkilot xodimlarining so‘zlariga ko‘ra, gumonlanuvchining tana harorati 40 darajagacha ko‘tarilib ketgan. Shunga qaramay, u hamkasblarining iltimosini e’tiborsiz qoldirgan. Kun davomida u ish joyida yo‘talib, ataylab tibbiy niqobini yechib yurgan va hamkasblarining barchasiga koronavirus yuqtirmoqchiligini aytgan.
Kechqurun uning koronavirusga topshirgan testi musbat natija bergan. Tekshiruv davomida aniqlanishicha, kompaniyaning yana besh nafar xodimi koronavirus bilan kasallangan va ular ham o‘z navbatida virusni atrofidagilarga yuqtirgan, ular orasida yosh bolalar ham bor. Gumonlanuvchi borgan mashg‘ulot zalida esa koronavirus bilan uch kishi bevosita zararlangan va natijada ularning qarindoshlari ham koronavirus yuqtirib olgan. 22 nafar kasallanganlarning hech biri shifoxonaga yotqizilmagan, deb ta’kidladi politsiya.
Avvalroq COVID-kasalxonadagi yong‘indan keyin Iroq sog‘liqni saqlash vaziri Hasan at-Tamimiy va Bag‘dod gubernatori Jabir al-Ata ishdan bo‘shatilgandi. Yong‘in 88 kishining o‘limiga sabab bo‘lgani aytilmoqda.
Shuningdek, Yer yuzining eng yuqori nuqtasini zabt etishni rejalashtirgan alpinist Erlend Nessga koronavirus tashxisi qo‘yildi va uni evakuatsiya qilishga to‘g‘ri keldi. Alpinistning o‘zi virus bilan kasallanganini bilmagan. Sportchi tepalikka ko‘tarilish uchun Nepalga kelgan, lekin tog‘larda u sog‘lig‘i kun sayin yomonlashib borayotganini tushungan. Tog‘ga chiqqanidan keyin u olti kun o‘zini yomon his qilgan.
Izoh (0)