AQShda tashkil etilgan iqlim bo‘yicha virtual sammitda bir qator davlatlar rahbarlari nutq so‘zladi. Bu haqda “Korrespondent.net” xabar berdi.
Sammitni AQSh prezidenti Jo Bayden ochib berdi. U mamlakatning atmosferaga zararli chiqindilarning chiqarilishini to‘xtatish bo‘yicha 2050-yilgacha mo‘ljallangan rejalarini bayon qildi va barcha mamlakatlarni iqlim o‘zgarishiga qarshi kurashishga chaqirdi.
Germaniya kansleri Angela Merkel mamlakatining 2038-yilgacha ko‘mirdan elektr manbayi sifatida foydalanishini bekor qilishni rejalashtirayotganini ma’lum qildi.
“2038-yilgacha biz ko‘mirdan elektr manbayi sifatida foydalanishdan voz kechib, qayta ishlanadigan manbalardan foydalanishni boshlamoqchimiz. O‘tgan yili biz 46 foiz energiyani qayta ishlanadigan manabalardan oldik”, — dedi u.
Merkelning qayd etishicha, 1990-yilga taqqoslaganda, Germaniya chiqindilar miqdorini 40 foizga qisqartirgan.
Fransiya prezidenti Emmanuel Makron iqlim o‘zgarishiga qarshi kurash bo‘yicha majburiyatlarni bajarishda tezlik bilan oldinga harakat qilishga chaqirdi.
“Biz 2030-yilgacha iqlim o‘zgarishiga qarshi kurash bo‘yicha o‘z zimmamizga olgan majburiyatlarni bajarish uchun tezroq oldinga harakat qilishimiz kerak”, — dedi u.
Makron texnologiyalar muammosini, xususan, quyosh energiyasidan foydalanish uchun yangi batareyalar yaratishni muhokama qilish taklifini berdi. “Shuningdek, biz moliyaviy tizimni to‘liq o‘zgartirishimiz kerak. Xalqaro darajadagi tartibga solish tizimini yo‘lga qo‘yish muhim. Agar bizda uglerod uchun muayyan to‘lov bo‘lmasa, unda ekologik rivojlanish ham bo‘lmaydi”, — dedi Fransiya yetakchisi.
Kanada bosh vaziri Jastin Tryudo uning mamlakati 2030-yilga kelib karbonat angidrid chiqindilarini 2005-yildagidan 30 foizga emas, balki 40—45 foizga kamaytirmoqchi ekanini aytdi. U Kanadaning 2050-yilga kelib atmosferaga zararli chiqindilar chiqarilishini to‘liq to‘xtatish bo‘yicha maqsadlariga erishish uchun yanada ko‘proq harakat qilishga va’da berdi.
“Bugungi kunda ko‘plab mamlakatlar iqlim o‘zgarishiga qarshi birgalikda kurashayotgani meni ruhlantirmoqda. Bu hamkorlik dunyoning barcha burchaklaridagi odamlar duch kelayotgan qiyinchiliklarni yengishning yagona yo‘li”, — dedi u.
Yaponiya bosh vaziri Yosixide Suga Parij kelishuvining maqsadlariga erishishda rivojlanayotgan mamlakatlarga yordam berish uchun tashkil etilgan Yashil iqlim fondiga 3 milliard dollar ajratishni va’da qildi.
Shuningdek, Suganing ma’lum qilishicha, Yaponiya hukumati 2030-yilgacha havoga chiqarilayotgan issiqxona gazlarini 2013-yilga taqqoslaganda 46 foizgacha qisqartirishni rejalashtirmoqda.
O‘z navbatida, Rossiya prezidenti Vladimir Putin zararli chiqindilarning barcha turlarini monitoring qilish bo‘yicha xalqaro hamkorlikni yo‘lga qo‘yishni taklif qildi.
Shuningdek, Putin hukumatning Rossiyada toza texnologiyalarga investitsiya kiritmoqchi bo‘lgan xorijiy kompaniyalarga imtiyozlar berishga tayyor ekanini ta’kidladi.
Putin Rossiyaning ushbu sohadagi xalqaro majburiyatlarini bajarishga mas’uliyat bilan yondashayotganini aytdi. Uning so‘zlariga ko‘ra, eng avvalo, bu BMTning iqlim o‘zgarishi to‘g‘risidagi asosiy konvensiyasi, Kioto protokoli va Parij kelishuvini amalga oshirish bilan bog‘liq hisoblanadi. Prezidentning qo‘shimcha qilishicha, Rossiya mamlakatda uglerod chiqindilari ustidan nazoratni ta’minlovchi va uning kamayishini rag‘batlantiruvchi zamonaviy qonunchilikni shakllantirish ustida faol ish olib bormoqda.
Putinning so‘zlariga ko‘ra, 1990-yildan buyon mamlakatda issiqxona gazlarining hajmi ikki barobarga qisqarib, karbonat angidrid hajmi 3,1 milliard tonnadan 1,6 milliard tonnaga kamaydi.
“Rossiya Federatsiyasi iqlim o‘zgarishi va boshqa barcha dolzarb global muammolarga samarali yechim izlashni davom ettirish uchun xalqaro hamkorlikni kengaytirishdan manfaatdor ekanini yana bir bor ta’kidlamoqchiman”, — dedi u.
Hindiston bosh vaziri Narendra Modi “iqlim o‘zgarishiga qarshi kurashning o‘n yilligi”ni e’lon qilishni taklif qildi va mamlakatlarni ushbu yo‘nalishda aniq choralar ko‘rishga chaqirdi.
Uning so‘zlariga ko‘ra, Hindiston tabiatni muhofaza qilishda javobgar davlat sifatida o‘z rolini bajarmoqda.
“Bizning ulkan maqsadimiz 2030-yilgacha qayta tiklanadigan energiya ishlab chiqarishni 450 gigavattga yetkazish hisoblanadi. Bugun global iqlim sharoitlarini muhokama qilayotgan bir paytda, Hindistonda jon boshiga to‘g‘ri keladigan uglerod miqdori dunyo miqyosidagi ko‘rsatkichdan 60 foizga pastroq ekanini inobatga olishingizni istar edim. Buning sababi shundaki, bizning turmush tarzimiz hozirgacha barqaror an’anaviy amaliyotlardan kelib chiqadi”, — dedi Hindiston bosh vaziri.
Shuningdek, Modi Hindiston va AQSh o‘rtasida iqlim va toza energiya bo‘yicha hamkorlik dasturining boshlanganini ma’lum qildi. Hamkorlikning maqsadi investitsiyalarni jalb qilish, toza texnologiyalarni namoyish etish va ekologik hamkorlik uchun imkoniyatlar yaratishdan iborat.
Ma’lumot uchun, sammitda, taxminan, 40 ta davlat yetakchilari ishtirok etmoqda.
Uning asosiy maqsadi sayyoradagi haroratning Selsiy bo‘yicha 1,5 darajaga ko‘tarilishini to‘xtatishga qaratilgan harakatlarni kuchaytirish bo‘ladi.
Izoh (0)