АҚШда ташкил этилган иқлим бўйича виртуал саммитда бир қатор давлатлар раҳбарлари нутқ сўзлади. Бу ҳақда «Korrespondent.net» хабар берди.
Саммитни АҚШ президенти Жо Байден очиб берди. У мамлакатнинг атмосферага зарарли чиқиндиларнинг чиқарилишини тўхтатиш бўйича 2050 йилгача мўлжалланган режаларини баён қилди ва барча мамлакатларни иқлим ўзгаришига қарши курашишга чақирди.
Германия канцлери Ангела Меркель мамлакатининг 2038 йилгача кўмирдан электр манбайи сифатида фойдаланишини бекор қилишни режалаштираётганини маълум қилди.
«2038 йилгача биз кўмирдан электр манбайи сифатида фойдаланишдан воз кечиб, қайта ишланадиган манбалардан фойдаланишни бошламоқчимиз. Ўтган йили биз 46 фоиз энергияни қайта ишланадиган манабалардан олдик», — деди у.
Меркелнинг қайд этишича, 1990 йилга таққослаганда, Германия чиқиндилар миқдорини 40 фоизга қисқартирган.
Франция президенти Эммануэль Макрон иқлим ўзгаришига қарши кураш бўйича мажбуриятларни бажаришда тезлик билан олдинга ҳаракат қилишга чақирди.
«Биз 2030 йилгача иқлим ўзгаришига қарши кураш бўйича ўз зиммамизга олган мажбуриятларни бажариш учун тезроқ олдинга ҳаракат қилишимиз керак», — деди у.
Макрон технологиялар муаммосини, хусусан, қуёш энергиясидан фойдаланиш учун янги батареялар яратишни муҳокама қилиш таклифини берди. «Шунингдек, биз молиявий тизимни тўлиқ ўзгартиришимиз керак. Халқаро даражадаги тартибга солиш тизимини йўлга қўйиш муҳим. Агар бизда углерод учун муайян тўлов бўлмаса, унда экологик ривожланиш ҳам бўлмайди», — деди Франция етакчиси.
Канада бош вазири Жастин Трюдо унинг мамлакати 2030 йилга келиб карбонат ангидрид чиқиндиларини 2005 йилдагидан 30 фоизга эмас, балки 40—45 фоизга камайтирмоқчи эканини айтди. У Канаданинг 2050 йилга келиб атмосферага зарарли чиқиндилар чиқарилишини тўлиқ тўхтатиш бўйича мақсадларига эришиш учун янада кўпроқ ҳаракат қилишга ваъда берди.
«Бугунги кунда кўплаб мамлакатлар иқлим ўзгаришига қарши биргаликда курашаётгани мени руҳлантирмоқда. Бу ҳамкорлик дунёнинг барча бурчакларидаги одамлар дуч келаётган қийинчиликларни енгишнинг ягона йўли», — деди у.
Япония бош вазири Ёсихидэ Суга Париж келишувининг мақсадларига эришишда ривожланаётган мамлакатларга ёрдам бериш учун ташкил этилган Яшил иқлим фондига 3 миллиард доллар ажратишни ваъда қилди.
Шунингдек, Суганинг маълум қилишича, Япония ҳукумати 2030 йилгача ҳавога чиқарилаётган иссиқхона газларини 2013 йилга таққослаганда 46 фоизгача қисқартиришни режалаштирмоқда.
Ўз навбатида, Россия президенти Владимир Путин зарарли чиқиндиларнинг барча турларини мониторинг қилиш бўйича халқаро ҳамкорликни йўлга қўйишни таклиф қилди.
Шунингдек, Путин ҳукуматнинг Россияда тоза технологияларга инвестиция киритмоқчи бўлган хорижий компанияларга имтиёзлар беришга тайёр эканини таъкидлади.
Путин Россиянинг ушбу соҳадаги халқаро мажбуриятларини бажаришга масъулият билан ёндашаётганини айтди. Унинг сўзларига кўра, энг аввало, бу БМТнинг иқлим ўзгариши тўғрисидаги асосий конвенцияси, Киото протоколи ва Париж келишувини амалга ошириш билан боғлиқ ҳисобланади. Президентнинг қўшимча қилишича, Россия мамлакатда углерод чиқиндилари устидан назоратни таъминловчи ва унинг камайишини рағбатлантирувчи замонавий қонунчиликни шакллантириш устида фаол иш олиб бормоқда.
Путиннинг сўзларига кўра, 1990 йилдан буён мамлакатда иссиқхона газларининг ҳажми икки баробарга қисқариб, карбонат ангидрид ҳажми 3,1 миллиард тоннадан 1,6 миллиард тоннага камайди.
«Россия Федерацияси иқлим ўзгариши ва бошқа барча долзарб глобал муаммоларга самарали ечим излашни давом эттириш учун халқаро ҳамкорликни кенгайтиришдан манфаатдор эканини яна бир бор таъкидламоқчиман», — деди у.
Ҳиндистон бош вазири Нарендра Моди «иқлим ўзгаришига қарши курашнинг ўн йиллиги»ни эълон қилишни таклиф қилди ва мамлакатларни ушбу йўналишда аниқ чоралар кўришга чақирди.
Унинг сўзларига кўра, Ҳиндистон табиатни муҳофаза қилишда жавобгар давлат сифатида ўз ролини бажармоқда.
«Бизнинг улкан мақсадимиз 2030 йилгача қайта тикланадиган энергия ишлаб чиқаришни 450 гигаваттга етказиш ҳисобланади. Бугун глобал иқлим шароитларини муҳокама қилаётган бир пайтда, Ҳиндистонда жон бошига тўғри келадиган углерод миқдори дунё миқёсидаги кўрсаткичдан 60 фоизга пастроқ эканини инобатга олишингизни истар эдим. Бунинг сабаби шундаки, бизнинг турмуш тарзимиз ҳозиргача барқарор анъанавий амалиётлардан келиб чиқади», — деди Ҳиндистон бош вазири.
Шунингдек, Моди Ҳиндистон ва АҚШ ўртасида иқлим ва тоза энергия бўйича ҳамкорлик дастурининг бошланганини маълум қилди. Ҳамкорликнинг мақсади инвестицияларни жалб қилиш, тоза технологияларни намойиш этиш ва экологик ҳамкорлик учун имкониятлар яратишдан иборат.
Маълумот учун, саммитда, тахминан, 40 та давлат етакчилари иштирок этмоқда.
Унинг асосий мақсади сайёрадаги ҳароратнинг Цельсий бўйича 1,5 даражага кўтарилишини тўхтатишга қаратилган ҳаракатларни кучайтириш бўлади.
Изоҳ (0)