AQSh Indoneziyaning g‘oyib bo‘lgan suvosti kemasini qidirish uchun aviatsiya yuboradi

AQSh Indoneziyaning Bali oroli yaqinida bedarak yo‘qolgan KRI Nanggala-402 suvosti kemasini qidirishda yordam berish uchun samolyotlar yuboradi. Bu haqda Pentagon vakili Jon Kirbiga tayanib, “RBK” xabar berdi.

“Biz Indoneziya suvosti kemasi yo‘qolgani haqidagi yangiliklardan, Indoneziya dengizchilari va ularning oilalari holidan chuqur qayg‘u chekdik. Indoneziya hukumatining taklifiga binoan yo‘qolgan suvosti kemasini qidirishda yordam berish uchun havo vositalarini jo‘natyapmiz”, — deb yozgan u.

Indoneziya harbiy dengiz kuchlari shtabi rahbari admiral Yudo Margononing aytishicha, bedarak yo‘qolgan suvosti kemasini qidirishga 3 ta suvosti kemasi, 5 ta samolyot va 21 ta harbiy kema jalb qilingan. Singapur va Malayziya ham qidiruv-qutqaruv ishlarida yordam bermoqda.

Margononing qo‘shimcha qilishicha, kemada ekipajning barcha a’zolari uchun 24 aprel soat 03:00 gacha (24 aprel kuni Toshkent vaqti bilan 23:00 gacha) yetadigan kislorod bor edi.

Eslatib o‘tamiz, Indoneziyaning harbiy dengiz kuchlariga tegishli bo‘lgan, Germaniyada ishlab chiqarilgan KRI Nanggala-402 suvosti kemasi torpedalar bilan mashg‘ulot o‘tkazgan, lekin natijalar haqida xabar bermagan. Taxminlarga ko‘ra, Balidan 96 kilometr shimolda aloqa uzilib qolgan. Dengiz osti kemasida 53 kishi bor edi.

Keyinchalik mamlakat mudofaa vazirligi indoneziyalik qutqaruvchilar suv osti kemasining aloqa uzilmasdan oldin joylashgan joyi yaqinida neft izlarini aniqladi.

Biroq, Indoneziya dengiz kuchlari vakili Ahmad Ar-Riyodning so‘zlariga ko‘ra, kemani topishda bu yetarli emas.Uning ta’kidlashicha, topilgan neft “kema suzuvchanligini saqlab qolish uchun ekipaj tomonidan ataylab to‘kilgan bo‘lishi mumkin”.

Avvalroq Rossiyaning Otradnoy shahridagi “Pella” kemasozlik zavodida qurilayotgan “Scorpion” trauleri (baliq ovlash kemasi) sinovlar paytida ag‘darilib ketgani haqida xabar berilgandi. Hodisa sodir bo‘lgan paytda trauler bortida 80 kishi bo‘lgan, 78 nafar ishchi “zudlik bilan evakuatsiya qilingan”. Shuningdek, hodisa oqibatida traulerning bir erkak va bir ayol xodimi halok bo‘lgani haqida xabar qilindi.