21-aprel kuni O‘zbekiston tashqi ishlar vaziri Abdulaziz Komilov AQSh davlat kotibi Entoni Blinken bilan telefon orqali muloqot qildi. Bu haqda vazirlik matbuot xizmati xabar berdi.
Ta’kidlanishicha, suhbat davomida ko‘p qirrali O‘zbekiston—Amerika strategik sherikligining hozirgi holati va uni yanada chuqurlashtirishning istiqbollari muhokama qilingan.
AQSh tomoni O‘zbekistonda amalga oshirilayotgan demokratik o‘zgarishlarga yuqori baho bergan. Jumladan, odam savdosiga qarshi kurashish va e’tiqod erkinligini ta’minlash sohasida erishilgan yutuqlar e’tirof etilgan. Tomonlar “C5+1” shakli doirasidagi faol hamkorlikni davom ettirish muhimligini qayd etilgan.
Afg‘onistonda mojarodan keyingi davrda ijtimoiy-iqtisodiy hayotni qayta tiklash uchun mamlakatni mintaqaviy integratsiya jarayonlariga jalb qilish masalalariga alohida e’tibor qaratilgan.
O‘zbekiston TIV rahbari davlat kotibini 2021-yil iyul oyida Toshkent shahrida o‘tkaziladigan “Markaziy va Janubiy Osiyo: mintaqaviy bog‘liqlik. Tahdidlar va imkoniyatlar” mavzusidagi yuqori darajali xalqaro konferensiyaga taklif qilgan.
Avvalroq Abdulaziz Komilov Rossiyaning O‘zbekistondagi yangi elchisini qabul qilgani, O‘zbekistondagi missiyasini yakunlayotgan Tojikiston elchisi bilan uchrashgani to‘g‘risida xabar berilgandi.
Izoh (0)