Adliya vaziri Ruslanbek Davletov 22-aprel kuni Tashkent Law Spring II xalqaro yuridik forumining ochilish marosimida qonunchilikni raqamlashtirish masalaga to‘xtalib o‘tdi. “Gazeta.uz”ning yozishicha, vazir qonunchilikni raqamlashtirishni eng muhim va murakkab jarayon deb atadi, chunki “rivojlanayotgan texnologiyalardan qanday foydalanish kerak, bor tartib va qoidalarga putur yetkazib, teskari natijalar olib kelmaydimi, degan savollar ustida o‘ylash kerak”.
“Biz bir yil oldin qonunchilik hujjatlari loyihalarini elektron ishlab chiqish va kelishish tizimini kiritdik va bu juda qo‘l keldi, hozirgacha 1000 ta hujjat bu tizim orqali o‘tdi, birinchi marta esa idoraviy hujjatni to‘liq elektron shaklda qabul qildik”, — degan u.
Vazirning so‘zlariga ko‘ra, qonun chiqarishda shaffoflikning muhim elementi manfaatdor tomonlarning qonun ijodkorligida keng ishtiroki hisoblanadi. Ko‘pgina mamlakatlarda, shu jumladan, O‘zbekistonda qonun loyihalarini jamoatchilik muhokamasiga joylashtirish uchun mo‘ljallangan maxsus veb-portallar mavjud.
Uning ta’kidlashicha, umuman olganda, buni to‘g‘ridan to‘g‘ri demokratiyaning namoyon bo‘lishi deb atash mumkin. Ammo, afsuski, bu sohadagi ulkan imkoniyatlardan to‘liq foydalanilmayapti.
“Ayrim vazirlik va idoralar tor doiradagi manfaatlarni ilgari surish uchun ham jamoatchilik muhokamasidan foydalanmaslikka harakat qiladi, chunki biladi katta tanqid ostida qolishini, mana shuning uchun ham bu mexanizm juda katta ahamiyatlidir.
Yoki bo‘lmasa, bir guruh shaxslar tomonidan alohida savollarni kichkina muammoni ma’lum bir yo‘l bilan hal qilishda ko‘pchilik qiziqish bildirayotgandek ko‘rsatish orqali yolg‘on taassurot uyg‘otishi, ya’ni jamoatchilik fikrini manipulyatsiya qilishi mumkin. Bu ham mavjud xavf-hatardir. Biz barcha suiiste’molchiliklarga tayyor turishimiz kerak va yuridik hamjamiyat qonun ijodkorligi sohasida jamoatchilik bilan o‘zaro aloqada maqbul yechimni topishi lozim”, — degan Ruslanbek Davletov.
Adliya vaziri davlat organlari faoliyatini takomillashtirish va ochiqligini ta’minlash muhimligini qayd etgan.
“Amaliyot shuni ko‘rsatmoqdaki, mamlakatimizda davlat va xalq o‘rtasidagi muloqotning eng qulay shakli mobil ilovalardir. Mazkur sohada ko‘rinmas davlat konsepsiyasining ulkan salohiyati mavjud, bunda davlat bilan bog‘liq har qanday masalani onlayn rejimda hal qilish mumkin”, — degan u.
Ruslanbek Davletovning ma’lum qilishicha, bu boradagi keng ko‘lamli chora-tadbirlarni amalga oshirish maqsadida Adliya vazirligi tomonidan “Ochiq va hisobdor hukumat” loyihasi ishlab chiqilib, hukumatga kiritildi.
Izoh (0)