21 апрель куни Ўзбекистон ташқи ишлар вазири Абдулазиз Комилов АҚШ давлат котиби Энтони Блинкен билан телефон орқали мулоқот қилди. Бу ҳақда вазирлик матбуот хизмати хабар берди.
Таъкидланишича, суҳбат давомида кўп қиррали Ўзбекистон—Америка стратегик шериклигининг ҳозирги ҳолати ва уни янада чуқурлаштиришнинг истиқболлари муҳокама қилинган.
АҚШ томони Ўзбекистонда амалга оширилаётган демократик ўзгаришларга юқори баҳо берган. Жумладан, одам савдосига қарши курашиш ва эътиқод эркинлигини таъминлаш соҳасида эришилган ютуқлар эътироф этилган. Томонлар «C5+1» шакли доирасидаги фаол ҳамкорликни давом эттириш муҳимлигини қайд этилган.
Афғонистонда можародан кейинги даврда ижтимоий-иқтисодий ҳаётни қайта тиклаш учун мамлакатни минтақавий интеграция жараёнларига жалб қилиш масалаларига алоҳида эътибор қаратилган.
Ўзбекистон ТИВ раҳбари давлат котибини 2021 йил июль ойида Тошкент шаҳрида ўтказиладиган «Марказий ва Жанубий Осиё: минтақавий боғлиқлик. Таҳдидлар ва имкониятлар» мавзусидаги юқори даражали халқаро конференцияга таклиф қилган.
Аввалроқ Абдулазиз Комилов Россиянинг Ўзбекистондаги янги элчисини қабул қилгани, Ўзбекистондаги миссиясини якунлаётган Тожикистон элчиси билан учрашгани тўғрисида хабар берилганди.
Изоҳ (0)