Toshkent viloyatidagi 18 ta umumiy o‘rta ta’lim maktabining o‘qituvchi va o‘quvchilari orasida koronavirus infeksiyasini yuqtirish holatlari aniqlanganligi sababli mazkur maktablarda o‘quv jarayonlari masofaviy shaklga o‘tkazildi, deb xabar berdi viloyat hokimligi matbuot xizmati.
Xabarda aytilishicha, ushbu maktablarning 14 tasida o‘qish to‘liq masofaviy shaklga, qolgan 4 ta maktabda esa ayrim sinflar masofaviy shaklga o‘tkazilgan.
To‘liq masofaviy shaklga o‘tkazilgan maktablar quyidagilar:
- O‘rta Chirchiq tumanidagi 3 va 54-sonli maktab;
- Bo‘ka tumanidagi 2-sonli maktab;
- Chirchiq shahridagi 8 va 9-sonli maktab;
- Piskent tumanidagi 36-sonli maktab;
- Parkent tumanidagi 22 va 51-sonli maktab;
- Toshkent tumanidagi 9, 12, 17 va 18-sonli maktab;
- Olmaliq shahridagi 17-maktab;
- Nurafshon shahridagi 1-sonli maktab.
Yuqoridagi maktablarning 30 nafar o‘quvchisi hamda 25 nafar o‘qituvchisida koronavirus kasalligi borligi aniqlangan.
Toshkent viloyati Sanitariya-epidemiologik osoyishtalik va jamoat salomatligi xizmati boshqarmasi bergan ma’lumotlarga ko‘ra, 19-aprel kuni 37 kishida koronavirus infeksiyasi aniqlangan. Shundan kunlik emlanganlar 163 nafarni, mavsum boshidan buyon viloyatda emlanganlar soni 2790 nafarni tashkil etmoqda.
Ma’lumot uchun, epidemiologik holat og‘irlashgan hududlarda mahalliy hokimlik organlariga karantin talablarini kuchaytirish choralarini ko‘rish vakolati berilgan. Shuni inobatga olib, hududiy hokimliklar ba’zi tumanlardagi maktablarni to‘liq masofaviy ta’lim shakliga o‘tkazish bo‘yicha qaror qabul qilishi mumkin.
Avvalroq Buxoro shahridagi maktab o‘quvchisida COVID-19 aniqlangani sabab maktab karantinga yopilgani haqida xabar berilgan edi.
Izoh (0)