Тошкент вилоятидаги 18 та умумий ўрта таълим мактабининг ўқитувчи ва ўқувчилари орасида коронавирус инфекциясини юқтириш ҳолатлари аниқланганлиги сабабли мазкур мактабларда ўқув жараёнлари масофавий шаклга ўтказилди, деб хабар берди вилоят ҳокимлиги матбуот хизмати.
Хабарда айтилишича, ушбу мактабларнинг 14 тасида ўқиш тўлиқ масофавий шаклга, қолган 4 та мактабда эса айрим синфлар масофавий шаклга ўтказилган.
Тўлиқ масофавий шаклга ўтказилган мактаблар қуйидагилар:
- Ўрта Чирчиқ туманидаги 3 ва 54-сонли мактаб;
- Бўка туманидаги 2-сонли мактаб;
- Чирчиқ шаҳридаги 8 ва 9-сонли мактаб;
- Пискент туманидаги 36-сонли мактаб;
- Паркент туманидаги 22 ва 51-сонли мактаб;
- Тошкент туманидаги 9, 12, 17 ва 18-сонли мактаб;
- Олмалиқ шаҳридаги 17-мактаб;
- Нурафшон шаҳридаги 1-сонли мактаб.
Юқоридаги мактабларнинг 30 нафар ўқувчиси ҳамда 25 нафар ўқитувчисида коронавирус касаллиги борлиги аниқланган.
Тошкент вилояти Санитария-эпидемиологик осойишталик ва жамоат саломатлиги хизмати бошқармаси берган маълумотларга кўра, 19 апрель куни 37 кишида коронавирус инфекцияси аниқланган. Шундан кунлик эмланганлар 163 нафарни, мавсум бошидан буён вилоятда эмланганлар сони 2790 нафарни ташкил этмоқда.
Маълумот учун, эпидемиологик ҳолат оғирлашган ҳудудларда маҳаллий ҳокимлик органларига карантин талабларини кучайтириш чораларини кўриш ваколати берилган. Шуни инобатга олиб, ҳудудий ҳокимликлар баъзи туманлардаги мактабларни тўлиқ масофавий таълим шаклига ўтказиш бўйича қарор қабул қилиши мумкин.
Аввалроқ Бухоро шаҳридаги мактаб ўқувчисида COVID-19 аниқлангани сабаб мактаб карантинга ёпилгани ҳақида хабар берилган эди.
Изоҳ (0)