Россия Ташқи ишлар вазирлиги Москвадаги Болгария элчихонасининг икки ходимини persona non grata (хуш кўрилмаган инсон) деб эълон қилди. Бу ҳақда Meduza хабар берди.
Хабарга кўра, консуллик хизматининг биринчи котиби Николай Панаётов ва савдо-иқтисодий масалалар бўйича биринчи котиб Чавдар Христозовга 72 соат ичида Россия ҳудудидан чиқиб кетиш буюрилган.
«Ушбу чора Болгариянинг Софиядаги Россия элчихонасининг икки ходимини март ойида қабул қилинган persona non grata деб эълон қилиш тўғрисидаги асоссиз қарорига жавобдир», — дейилади Ташқи ишлар вазирлиги баёнотида.
Март ойи охирида Болгария Ташқи ишлар вазирлиги россиялик икки нафар дипломатни persona non grata деб эълон қилган ва уларга мамлакатдан чиқиб кетишлари учун 72 соат вақт берган эди.
Аввалроқ Болгария прокуратураси икки нафар россиялик дипломатнинг жосуслик фаолияти билан шуғуллангани ва дипломатик мақомига тўғри келмайдиган ишларни қилганини маълум қилганди.
Софиядаги Россия элчихонаси Болгария ҳукуматининг навбатдаги асосланмаган ҳаракати Россия—Болгария ўртасидаги конструктив мулоқотга хизмат қилмаслигини қайд этган. Элчихона Россия мазкур ҳаракатларга нисбатан жавоб қайтариш ҳуқуқига эга эканлигини эслатиб ўтган.
19 март куни Болгария прокуратураси маҳаллий амалдорлардан иборат гуруҳнинг қўлга олингани, улар Россия манфаатини кўзлаб, жосуслик билан шуғулланганликда гумонланаётгани ҳақида хабар берган. Ҳибсга олинганлар орасида россияликлар бўлмаган.
2019 йил октябрь ойидан бери Болгария жами саккиз нафар россиялик дипломатни ортга қайтарган (22 март куни persona non grata бўлган икки дипломатни ҳам қўшиб ҳисоблаганди). Қайтарилганларнинг ҳаммаси жосуслик фаолиятини олиб борганликда гумон қилинган.
Изоҳ (0)