Alvaro Montoro ismli texaslik dasturchi real vaqt rejimida Amazon rahbari Jeff Bezosning daromadini hisoblaydigan onlayn kalkulyatorni yaratdi, deb xabar beradi Meduza.
Saytga hisoblagich o‘rnatilgan bo‘lib, uning ostida “Ushbu sahifaga kirganingizdan buyon Jeff Bezos mana shuncha ishlab topdi” deya izoh bitilgan. Shundan so‘ng turli ranglardagi eslatmalar paydo bo‘ladi: “50 soniya. To‘liq jamlanmali Tesla Model S’ni xarid qilishga yetadi (182 ming dollar)”. Yoki “110 soniya. Bu AQSh prezidentining bir yillik maoshidan ko‘p (400 ming dollar)”.
Montoro o‘z hisob-kitoblarini amalga oshirishda Bloomberg va BuzzFedd ma’lumotlaridan foydalangan — ularga ko‘ra, Bezos har soniya 3605 dollar ishlab topadi.
Avvalroq Amazon asoschisi Jeff Bezos 2021-yilning uchinchi choragida kompaniya bosh direktorligi lavozimidan ketishi va direktorlar kengashining ijrochi raisi bo‘lishi haqida xabar berilgan edi. Uning o‘rnini 1997-yildan beri Amazon’da ishlab kelayotgan va Amazon Web Services’ni boshqaradigan Endi Jessi egallaydi.
Izoh (0)