Jeff Bezos 2021-yilning uchinchi choragida Amazon bosh direktori lavozimini tark etadi

Amazon asoschisi Jeff Bezos 2021-yilning uchinchi choragida kompaniya bosh direktorligi lavozimidan ketadi va direktorlar kengashining ijrochi raisi bo‘ladi. Uning o‘rnini 1997-yildan beri Amazon’da ishlab kelayotgan va Amazon Web Services’ni boshqaradigan Endi Jessi egallaydi, deb yozmoqda “Kommersant”.

“Yilning uchinchi choragida men direktorlar kengashining ijro etuvchi raisi lavozimiga o‘tayotganimni mamnuniyat bilan e’lon qilaman”, — dedi Bezos. U Endi Jessining ajoyib yetakchiga aylanishiga ishonadi. “Men ayni paytda Amazon eng yuqori innovatsion darajada turganiga guvoh bo‘lmoqdaman, shuning uchun almashinuv vaqti keldi”, — deya ta’kidladi biznesmen.

2020-yilda Amazon’ning daromadi 38 foizga o‘sib, 386,1 milliard dollarni tashkil etdi (2019-yilda 280,5 milliard dollar bo‘lgan). Yil davomida kompaniya 21,3 milliard dollar foyda ko‘rdi.

Amazon internet orqali tovar va xizmatlarni sotadigan eng yirik korporatsiyadir. Jeff Bezos unga 1994-yilda asos solgan. Fond bozorida kompaniya qiymati 1,69 trillion dollarga baholanmoqda. Jeff Bezos Forbes’ning eng boy odamlari ro‘yxatida birinchi o‘rinda turadi. Uning boyligi 196,2 milliard dollarga teng.

Avvalroq Jeff Bezos atrof-muhitni muhofaza qilishga 791 million dollar xayriya qilgan. Uning sobiq rafiqasi Makkenzi Skott to‘rt oy ichida koronavirusga qarshi kurash uchun 4,1 milliard dollar o‘tkazib bergan.