Polshaning Krakova shahrida istiqomat qiluvchi ayol daraxtda osilib turgan kruassanni noodatiy hayvon deb o‘ylab, hayvonlarni qutqarish xizmatini yordamga chaqirdi, deb xabar beradi Esquire.
Ta’kidlanishicha, hayvonlarni qutqarish xizmatiga xavotirga tushgan bir ayol murojaat qilib, uy oldidagi nastarin butasida ikki kundan buyon jigarrang jonzot o‘tirganini bildirgan. Ayol uy aholisi oynalarini ochishga qo‘rqayotganini ma’lum qilgan.
Telefon orqali hodisa bilan tanishgan operator bu iguan (kaltakesaklar oilasiga kiruvchi jonzot) bo‘lishi mumkinligini taxmin qilgan. Biroq reptiliyaning bahordagi tungi sovuqlar sabab ko‘chada omon qolishi dargumon.
Voqea joyiga yetib kelgan inspektorlar nastarin shoxlariga oddiy kruassan ilinib qolganini aniqlagan. Mutaxassislarning taxminicha, uni kimdir qushlarni ovqatlantirish uchun oynadan uloqtirgan.
Avvalroq avstraliyalik ayol dengiz qirg‘og‘ida tuxumga o‘xshash sirli jonzotga duch kelgani to‘g‘risida xabar berilgandi.
Izoh (0)