Buxoro viloyat yuqumli kasalliklar shifoxonasining koronavirusga chalingan bemorlar yotqizilayotgani aytilgan eski va nochor ko‘rinishli binosi suratlari ijtimoiy tarmoqlarda muhokamalarga sabab bo‘ldi. “Daryo” muxbiri kasalxonada bo‘lib, vaziyat bilan yaqindan tanishdi.
Viloyat yuqumli kasalliklar shifoxonasi Buxoro shahrining bir chekkasida joylashgani uchun, aftidan, ayrim hollarda e’tibordan chetda qolgan. Biroq so‘nggi yillarda shifoxonaning deyarli barcha binolarida qurilish-ta’mirlash ishlari amalga oshirilmoqda.
“Daryo” muxbiri dastlab kasalxona bosh binosi peshtoqidagi yozuvdagi xatoliklarga e’tibor qaratgan. Bosh shifokor O‘ktam Xolov mazkur holat yaqinda sodir bo‘lgan kuchli shamol va yog‘ingarchilik oqibatida yuz bergani, tuzatish ishlari allaqachon boshlanganini bildirdi.
Viloyat Sog‘liqni saqlash boshqarmasi boshlig‘i G‘ofur Saidov ijtimoiy tarmoqlarda muhokamaga sabab bo‘lgan voqeaga to‘xtalib, shifoxonaning eski binosidan ham vaqtincha foydalanishga to‘g‘ri kelganini bildirgan.
“O‘tkir ichak kasalliklari hamda OIV infeksiyasi bilan kasallangan bemorlarni davolashga moslashtirilgan mazkur shifoxona A, B, V hamda G bloklardan iborat. B blok, ya’ni 9-bo‘limda 2021-yilning 4-yanvar kunidan boshlab COVID-19 infeksiyasi bilan kasallangan bemorlar uchun karantin hududi sifatida tibbiy xizmat ko‘rsatib kelinmoqda. Bino shifoxonaning chekkasida bo‘lgani uchun boshqa korpuslardan izolyatsiya qilishga qulayligi hisobga olindi va bemorlar shu yerga yotqizildi. Haqiqatan ham mazkur binoning tashqi qismi ta’mirtalab. O‘tgan yilgi pandemiya davrida koronavirusga chalingan bemorlar soni oshib ketgani bois ularning sog‘lig‘ini tiklash va yashab qolishini ta’minlashimiz zarurati bilan shu blokdan vaqtincha foydalanishga to‘g‘ri keldi.
Ammo aytish o‘rinliki, 35 o‘ringa mo‘ljallangan ushbu blokning ichki qismi davolanish uchun barcha imkoniyatlarga ega. Zamonaviy tibbiy asbob-uskunalar o‘rnatilgan. Issiq va sovuq suv, kanalizatsiya ta’minoti mavjud. Koykalar soni yetarli. Koronavirus asoratlari aholi orasidan ancha uzoqlashgan bir davrda mazkur maskan juda qisqa muddatda, ya’ni yetti kun bemorsiz qoldi. Shu orada ichki qismini yana bir karra yengilroq ta’mirlashga ulgurdik. Avvaliga to‘rt nafar bemor yotqizilgan ushbu binoda ayni paytda davolanayotganlar soni 28 nafarni tashkil etmoqda”, — deydi G‘ofur Saidov.
O‘ktam Xolovning aytishicha, koronavirusga chalingan bir yoki undan ortiq bemorni asosiy binodagi xonalarning birida davolash uchun shifoxonaning butun boshli binosidan boshqa davolanuvchilarni ko‘chirishga to‘g‘ri keladi.
“Ma’lumki, shifoxonamizga yuqumli kasalliklar bilan murojaat etuvchi bemorlar juda ko‘p. Pandemiya davrida ham asosiy binolarimiz, xususan, A blok bemorlar bilan to‘la edi. Bir nafar koronavirusga chalingan bemorni ushbu binoda davolash uchun ham binodan boshqa bemorlar to‘liq ko‘chirilishi kerak edi. Xuddi o‘sha jarayonda boshqa tuman shifoxonalari ham bemorlar bilan gavjumlashgani bois asosiy hamda ta’mirlangan binolardan turli yuqumli kasalliklar bilan xastalangan bemorlarni ko‘chirish imkoni bo‘lmagandi”, — deydi O‘ktam Xolov.
“Daryo” muxbirining aniqlik kiritishicha, 2021-yilning 16-mart kuni shifoxona bosh shifokori imzosi bilan viloyat sog‘liqni saqlash boshqarmasi boshlig‘iga xat yuborilgan. Unda COVID-19 infeksiyasi bilan kasallangan bemorlarga qulay sharoit yaratish maqsadida, mart oyining ikkinchi yarmida viloyat yuqumli kasalliklar shifoxonasining B blokida mukammal ta’mirlash ishlari tugatilishi hamda 9-bo‘limda mukammal ta’mirlash ishlari boshlanishi munosabati bilan bemorlarni B blokka ko‘chirish ishlarini amalga oshirish boshlangani ma’lum qilingan.
“Bemorlar doimiy ravishda davolanib, ketma-ket kelayotgani uchun blok o‘tgan pandemiya davridan so‘ng bir hafta-o‘n kuncha kasallardan xoli bo‘lganda, binoning ichki qismini yengil ta’mirlashga ulgurdik. O‘sha paytda to‘liq ta’mirlashga ruxsat bo‘lmasdi, vaholanki koronavirusga chalingan bemorlar davolanayotgan binoda qurilish ishlarini olib borish imkoni ham yo‘q edi. Shu sababli ta’mirlash ishlari ortga surildi”, — dedi G‘ofur Saidov.
Bildirilishicha, mazkur bino 1984-yilda foydalanishga topshirilgan bo‘lib, hozirgi kunda mukammal ta’mirga muhtoj holga kelgan. Biroq investitsiya dasturi bo‘yicha, ushbu binoda mukammal ta’mirlash ishlari 2021-yilda o‘tkazilishi ko‘zda tutilgan. Shu bois 2021-yilda mazkur eski binoning kosmetik ta’mirlash ishlariga qo‘shimcha mablag‘ ajratish imkoni bo‘lmagan.
Surishtiruv jarayonida voqea joyida bo‘lgan “Daryo” muxbiri shifoxonaning A blokida davolanayotgan bemorlarning ko‘chirilayotganiga guvoh bo‘lgan. Ma’lum bo‘lishicha, viloyatning tuman, shaharlaridan davolanishga kelgan bemorlar o‘z hududlariga ko‘chirila boshlangan.
“Kuni kecha koronavirusga chalingan bemorlar davolanayotgan binoni qayta ta’mirlash va rekonstruksiya qilish uchun 3 milliard so‘mga yaqin mablag‘ ajratilgani ma’lum bo‘ldi. Ta’mirlash boshlanadi. Koronavirusga chalingan 28 nafar bemorning A blokka o‘tkazilishi o‘z-o‘zidan mazkur blokda davolanayotgan boshqa bemorlarning o‘z hududlariga ko‘chirilishini ta’minlashimiz zaruratini keltirib chiqaradi”, — deydi bosh shifokor.
“O‘tgan yildagi pandemiya davrida deyarli barcha kasalxonalardan foydalandik. Bu esa boshqa xastaliklar bilan davolanishi lozim bo‘lgan bemorlarni shifoxonalarga qabul qilish imkoniyatini chekladi. Sport maskanlari viloyatda ko‘p sonli bemorlarni qamrab olish uchun yetarli. Ayni paytda ham Buxoro shahridagi ‘Yoshlik’ sport majmuasida 262 o‘rinli, ‘Semurg‘’ sport kompleksida 170 o‘rinli barcha tibbiy sharoitlari mavjud maskanlar hozirlab qo‘yilgan. Bundan tashqari, ko‘chma jonlantirish bo‘limi ham tashkil etilib, unda 24 ta funksional karavot keltiriladi. Har bir bemor yakkalantirilgan tartibda muolaja qilinadi”, — dedi Sanitariya-epidemiologik osoyishtalik va jamoat salomatligi xizmatining Buxoro viloyati boshqarmasi boshlig‘i Ashur To‘xtayev.
Viloyat sog‘liqni saqlash boshqarmasi boshlig‘iga ko‘ra, ayni paytda mazkur shifoxona hududida yangi bino tiklash, shuningdek, mavjudlarini kapital ta’mirlash ishlari uchun 30 milliarddan ortiq mablag‘ moliyalashtirilgan. Shifoxona hududida 10 milliard so‘m mablag‘ evaziga qad rostlagan 180 o‘rinli yangi bino 20 kun ichida foydalanishga topshiriladi. Shuningdek, aynan mazkur shifoxona hududida dorixona, laboratoriya xonasi hamda 1,5 milliard so‘m mablag‘ evaziga kislorod stansiyasi ham barpo etilmoqda.
Izoh (0)