Бухоро вилоят юқумли касалликлар шифохонасининг коронавирусга чалинган беморлар ётқизилаётгани айтилган эски ва ночор кўринишли биноси суратлари ижтимоий тармоқларда муҳокамаларга сабаб бўлди. «Дарё» мухбири касалхонада бўлиб, вазият билан яқиндан танишди.
Вилоят юқумли касалликлар шифохонаси Бухоро шаҳрининг бир чеккасида жойлашгани учун, афтидан, айрим ҳолларда эътибордан четда қолган. Бироқ сўнгги йилларда шифохонанинг деярли барча биноларида қурилиш-таъмирлаш ишлари амалга оширилмоқда.
«Дарё» мухбири дастлаб касалхона бош биноси пештоқидаги ёзувдаги хатоликларга эътибор қаратган. Бош шифокор Ўктам Холов мазкур ҳолат яқинда содир бўлган кучли шамол ва ёғингарчилик оқибатида юз бергани, тузатиш ишлари аллақачон бошланганини билдирди.
Вилоят Соғлиқни сақлаш бошқармаси бошлиғи Ғофур Саидов ижтимоий тармоқларда муҳокамага сабаб бўлган воқеага тўхталиб, шифохонанинг эски биносидан ҳам вақтинча фойдаланишга тўғри келганини билдирган.
«Ўткир ичак касалликлари ҳамда ОИВ инфекцияси билан касалланган беморларни даволашга мослаштирилган мазкур шифохона А, Б, В ҳамда Г блоклардан иборат. Б блок, яъни 9-бўлимда 2021 йилнинг 4 январь кунидан бошлаб COVID-19 инфекцияси билан касалланган беморлар учун карантин ҳудуди сифатида тиббий хизмат кўрсатиб келинмоқда. Бино шифохонанинг чеккасида бўлгани учун бошқа корпуслардан изоляция қилишга қулайлиги ҳисобга олинди ва беморлар шу ерга ётқизилди. Ҳақиқатан ҳам мазкур бинонинг ташқи қисми таъмирталаб. Ўтган йилги пандемия даврида коронавирусга чалинган беморлар сони ошиб кетгани боис уларнинг соғлиғини тиклаш ва яшаб қолишини таъминлашимиз зарурати билан шу блокдан вақтинча фойдаланишга тўғри келди.
Аммо айтиш ўринлики, 35 ўринга мўлжалланган ушбу блокнинг ички қисми даволаниш учун барча имкониятларга эга. Замонавий тиббий асбоб-ускуналар ўрнатилган. Иссиқ ва совуқ сув, канализация таъминоти мавжуд. Койкалар сони етарли. Коронавирус асоратлари аҳоли орасидан анча узоқлашган бир даврда мазкур маскан жуда қисқа муддатда, яъни етти кун беморсиз қолди. Шу орада ички қисмини яна бир карра енгилроқ таъмирлашга улгурдик. Аввалига тўрт нафар бемор ётқизилган ушбу бинода айни пайтда даволанаётганлар сони 28 нафарни ташкил этмоқда», — дейди Ғофур Саидов.
Ўктам Холовнинг айтишича, коронавирусга чалинган бир ёки ундан ортиқ беморни асосий бинодаги хоналарнинг бирида даволаш учун шифохонанинг бутун бошли биносидан бошқа даволанувчиларни кўчиришга тўғри келади.
«Маълумки, шифохонамизга юқумли касалликлар билан мурожаат этувчи беморлар жуда кўп. Пандемия даврида ҳам асосий биноларимиз, хусусан, А блок беморлар билан тўла эди. Бир нафар коронавирусга чалинган беморни ушбу бинода даволаш учун ҳам бинодан бошқа беморлар тўлиқ кўчирилиши керак эди. Худди ўша жараёнда бошқа туман шифохоналари ҳам беморлар билан гавжумлашгани боис асосий ҳамда таъмирланган бинолардан турли юқумли касалликлар билан хасталанган беморларни кўчириш имкони бўлмаганди», — дейди Ўктам Холов.
«Дарё» мухбирининг аниқлик киритишича, 2021 йилнинг 16 март куни шифохона бош шифокори имзоси билан вилоят соғлиқни сақлаш бошқармаси бошлиғига хат юборилган. Унда COVID-19 инфекцияси билан касалланган беморларга қулай шароит яратиш мақсадида, март ойининг иккинчи ярмида вилоят юқумли касалликлар шифохонасининг Б блокида мукаммал таъмирлаш ишлари тугатилиши ҳамда 9-бўлимда мукаммал таъмирлаш ишлари бошланиши муносабати билан беморларни Б блокка кўчириш ишларини амалга ошириш бошлангани маълум қилинган.
«Беморлар доимий равишда даволаниб, кетма-кет келаётгани учун блок ўтган пандемия давридан сўнг бир ҳафта-ўн кунча касаллардан холи бўлганда, бинонинг ички қисмини енгил таъмирлашга улгурдик. Ўша пайтда тўлиқ таъмирлашга рухсат бўлмасди, ваҳоланки коронавирусга чалинган беморлар даволанаётган бинода қурилиш ишларини олиб бориш имкони ҳам йўқ эди. Шу сабабли таъмирлаш ишлари ортга сурилди», — деди Ғофур Саидов.
Билдирилишича, мазкур бино 1984 йилда фойдаланишга топширилган бўлиб, ҳозирги кунда мукаммал таъмирга муҳтож ҳолга келган. Бироқ инвестиция дастури бўйича, ушбу бинода мукаммал таъмирлаш ишлари 2021 йилда ўтказилиши кўзда тутилган. Шу боис 2021 йилда мазкур эски бинонинг косметик таъмирлаш ишларига қўшимча маблағ ажратиш имкони бўлмаган.
Суриштирув жараёнида воқеа жойида бўлган «Дарё» мухбири шифохонанинг А блокида даволанаётган беморларнинг кўчирилаётганига гувоҳ бўлган. Маълум бўлишича, вилоятнинг туман, шаҳарларидан даволанишга келган беморлар ўз ҳудудларига кўчирила бошланган.
«Куни кеча коронавирусга чалинган беморлар даволанаётган бинони қайта таъмирлаш ва реконструкция қилиш учун 3 миллиард сўмга яқин маблағ ажратилгани маълум бўлди. Таъмирлаш бошланади. Коронавирусга чалинган 28 нафар беморнинг А блокка ўтказилиши ўз-ўзидан мазкур блокда даволанаётган бошқа беморларнинг ўз ҳудудларига кўчирилишини таъминлашимиз заруратини келтириб чиқаради», — дейди бош шифокор.
«Ўтган йилдаги пандемия даврида деярли барча касалхоналардан фойдаландик. Бу эса бошқа хасталиклар билан даволаниши лозим бўлган беморларни шифохоналарга қабул қилиш имкониятини чеклади. Спорт масканлари вилоятда кўп сонли беморларни қамраб олиш учун етарли. Айни пайтда ҳам Бухоро шаҳридаги ‘Ёшлик’ спорт мажмуасида 262 ўринли, ‘Семурғ’ спорт комплексида 170 ўринли барча тиббий шароитлари мавжуд масканлар ҳозирлаб қўйилган. Бундан ташқари, кўчма жонлантириш бўлими ҳам ташкил этилиб, унда 24 та функционал каравот келтирилади. Ҳар бир бемор яккалантирилган тартибда муолажа қилинади», — деди Санитария-эпидемиологик осойишталик ва жамоат саломатлиги хизматининг Бухоро вилояти бошқармаси бошлиғи Ашур Тўхтаев.
Вилоят соғлиқни сақлаш бошқармаси бошлиғига кўра, айни пайтда мазкур шифохона ҳудудида янги бино тиклаш, шунингдек, мавжудларини капитал таъмирлаш ишлари учун 30 миллиарддан ортиқ маблағ молиялаштирилган. Шифохона ҳудудида 10 миллиард сўм маблағ эвазига қад ростлаган 180 ўринли янги бино 20 кун ичида фойдаланишга топширилади. Шунингдек, айнан мазкур шифохона ҳудудида дорихона, лаборатория хонаси ҳамда 1,5 миллиард сўм маблағ эвазига кислород станцияси ҳам барпо этилмоқда.
Изоҳ (0)