Buxoro viloyati Buxoro tumanidagi maktablarning birida o‘lim holati qayd etildi. Marhumning otasi qotil aniqligini, ammo unga chora ko‘rilmayotganini aytmoqda. Bu haqda surishtiruv olib borgan “Daryo” muxbirining ma’lum qilishicha, voqea 2021-yil 26-mart kuni tumandagi 28-maktabning sport zalida sodir bo‘lgan.
Viloyat prokuraturasi axborot xizmatining “Daryo”ga ma’lum qilishicha, ushbu holat bo‘yicha Buxoro tuman prokuraturasi tomonidan olib borilgan tergovga qadar tekshiruv davomida hodisa joyi va marhumning jasadi ko‘zdan kechirilib, aloqador shaxslardan tushuntirish xatlari olingan hamda o‘lim sababi va u bilan bog‘liq boshqa holatlarni aniqlash uchun sudga oid tibbiyot ekspertizasi tayinlangan. Shuningdek, 8-aprel kuni Jinoyat kodeksining 102-moddasi 1-qismi (ehtiyotsizlik orqasidan odam o‘ldirish) bilan jinoyat ishi qo‘zg‘atilgan.
“O‘g‘limning jasadini uyga olib kelsam, tomog‘ining tagi tovuqning tuxumidek shishib, ko‘karib ketgan ekan. Urib o‘ldirilgani ko‘rinib turgandi. Ammo oradan shuncha vaqt o‘tsa hamki, hech kim xabar olmayapti, hech qanday xulosa ham aytilmadi. O‘g‘limning qotili aniq, ammo hamma jim turibdi. 15-may kuni o‘g‘limning to‘yi bo‘lishi kerak edi. O‘limidan uch-to‘rt kun oldin fotiha to‘yini o‘tkazgan edik”, — deydi marhumning otasi Mustafo Xudoyberdiyev.
Bildirilishicha, 26-mart kuni kechki payt tumandagi “Gulshanobod” mahalla fuqarolar yig‘ini Losha qishlog‘ida yashovchi 20-25 nafar yigit hududda joylashgan maktabning sport zalida voleybol o‘ynagan. 1995-yilda tug‘ilgan Murodjon Ibragimov o‘yinga hakamlik qilgan. Soat taxminan 22:00 da Murodjon hamda shu qishloqda yashovchi 22 yoshli S.X. o‘rtasida kelishmovchilik kelib chiqqan.
“Soat, taxminan, kechki 10 dan oshgandi. Biz o‘ynayotganda ular chetda edi. Murodjon stulchada o‘tirib, hakamlik qilayotgandi. Kutilmaganda ular janjallashib qoldi. Odamlar ajratishga ulgurmayoq, ular yoqalashib ketdi. S. Murodjonning yuz qismiga ikki marta urdi. Murodjon polga yiqildi, keyin o‘rnidan turdi, bir-ikki qadamcha bosishga urindi. Yo‘q, yana polga uzala yiqildi va qaytib turmadi. Men tergov jarayonida ham qanday ko‘rgan bo‘lsam, shuni bildirdim. Yashiradigan holatmas bu”, — dedi voqea guvohi, Murodjonning hamqishlog‘i Bekzod Arziyev.
Mustafo Xudoyberdiyevning aytishicha, o‘g‘li Murodjon Ibragimov 26-mart kuni kechki payt soat 20:00 da sartaroshxonaga borish uchun uydan chiqib ketgan. So‘ng mahallada joylashgan 28-maktabning sport zaliga borgan va voleybol o‘ynayotgan qishloq bolalariga hakamlik qilgan. O‘yin davomida yon qo‘shnisi bilan og‘zaki tortishgan.
“Qishloq bolalarining aytishlaricha, S. kutilmagan paytda o‘g‘limning chap tarafidan kelib urgan. O‘g‘limning qotili aniq. U o‘g‘limni urganini barcha organ xodimlari ham eshitib, bilib turibdi. Ammo ishni yopishga harakat qilishyapti. S. bundan oldin ham uch-to‘rt kishini urib, hushidan ketkizgandi, ammo hech qanday chora ko‘rilgani yo‘q. S.X. o‘g‘limni qasddan urib, o‘ldirgan. O‘g‘limning qotiliga jazo bormi? U mening yakka-yu yolg‘iz o‘g‘lim edi. Mening endi bu dunyoda yashashdan nima maqsadim qoldi?!” — deydi ota.
Marhumning amakisi Abdulla Xudoyberdiyevning aytishicha, sport zaldagi holatdan o‘sha yerda bo‘lgan hamqishloq bolalarning barchasi xabardor bo‘lgan.
“Men ham voleybol o‘ynab o‘tirgan edim. S. jiyanimni urib, keyin qochib ketganini o‘z ko‘zim bilan ko‘rdim. Jiyanim polga yiqildi. S. ko‘chaga chiqib qochdi. Bir bola: ‘To‘yi bo‘lardi. Nega urding?’, deganda, ‘U meni so‘kdi, shuning uchun urdim’, dedi’”, — deydi Abdulla Xudoyberdiyev.
28-maktab direktori Madinabonu Safarovaning “Daryo”ga bildirishicha, maktabning sport zali kechki payt mahalla bolalari uchun ochib berilgan va bunga 2021-yilning 23-mart kunidan boshlab ruxsat berilgan. Voqea sodir bo‘lgan kuni direktorning xo‘jalik ishlari bo‘yicha o‘rinbosari hamda maktab qorovuli ham o‘sha yerda bo‘lgan va holatni ko‘rgan.
“Men sport zaliga kirganimdan yarim soat o‘tib, to‘polon bo‘ldi. S. Murodjonning yuziga urdi. Bir payt qarasam, Murodjon chap tomoni bilan polda yotibdi. Kasalxonaga olib borguncha, og‘zi va burnidan qon ketdi, afsuski, yo‘ldayoq joni uzildi”, — deydi qishloq fuqarosi Kamol Abdiyev.
Bildirilishicha, qishloq bolalari Murodjon Ibragimovni zudlik bilan kasalxonaga olib borgan. Biroq u Buxoro shahridagi Respublika shoshilinch tibbiy yordam ilmiy markazi viloyat filialiga borgunga qadar vafot etgan.
Filial bosh shifokori o‘rinbosari Qahramon Karimovning “Daryo”ga ma’lum qilishicha, bemor qabul qilingan va zudlik bilan tibbiy-nazorat tekshiruvi o‘tkazilgan va fuqaroning vafot etgani to‘la tasdiqlangan. Ichki ishlar organlari vakillari ishtirokida hujjatlar rasmiylashtirilib, ekspertizaga jo‘natilgan.
“Daryo” muxbiri holat yuzasidan tuman prokuraturasiga murojaat qilib, axborot olishga urindi. Muxbir bilan bog‘langan viloyat prokuraturasi axborot xizmati rahbari fuqaroning o‘limi yuzasidan hali ekspertiza xulosasi olinmaganini aytib, xulosani olish bir oyga qadar davom etishi mumkinligini bildirdi. Buxoro tuman prokuraturasi tergovchisi Shahobiddin Ismoilov “Daryo” muxbiri bilan suhbatda holat yuzasidan tergovga qadar surishtiruv ishlari davom etayotganini ma’lum qildi.
Marhumning otasi Mustafo Xudoyberdiyev o‘g‘lining o‘limida qo‘shnisi S.X.ni ayblarkan, uning qassobligiga, qoramollarni so‘yishga tayyorlashdan oldin ularning bo‘ynidan urib qanday yiqitsa, bunda ham xuddi shunday usulni qo‘llaganiga e’tibor qaratmoqda. “Qo‘shnimiz qassob bola. Berahm. Oldin chiqargan ishkallaridan ham uchastka nozirlari xabardor bo‘lgan”, — deya takrorladi ota.
Buxoro viloyat prokuraturasidan ma’lum qilishlaricha, ushbu ish bo‘yicha tergov viloyat prokuraturasi tomonidan nazoratga olingan.
“Daryo” voqealar rivojini kuzatishda davom etadi.
Izoh (0)