G‘ijduvon tuman hokimligi “Daryo” internet nashrida e’lon qilingan “‘Qarzimiz katta, yopishimiz kerak’. Buxorodagi bozor rahbari mavjud qarzdorligini yopish uchun noqonuniy pavilyon qurishga ruxsat bergan” sarlavhali maqolaga munosabat bildirdi.
Ma’lum qilinishicha, “G‘ijduvon dehqon bozori” aksiyadorlik jamiyati rahbari Vali Sodiqovning mavjud qarzdorlikni yopish uchun noqonuniy pavilyon qurishga ruxsat bergani haqidagi ma’lumotlar tumandagi mas’ul tashkilot mutaxassislari tomonidan o‘rganilgan.
Ta’kidlanishicha, Prezidentning 2017-yil 27-martdagi “2017—2019-yillar davrida dehqon bozorlarini rekonstruksiya qilish va ularning hududida zamonaviy savdo majmualari qurish dasturini tasdiqlash to‘g‘risida”gi qarori asosida “G‘ijduvon dehqon bozori” AJ savdo majmuasida tadbirkorlar mablag‘lari hisobidan qurilish-montaj ishlari olib borilishi nazarda tutilgan. Savdo do‘koni qurilishi uchun tadbirkorlarga 30 kun muddat ichida to‘lovni 100 foiz oldindan to‘lashlari tushuntirilgan. Lekin tadbirkorlar tomonidan belgilangan muddatda to‘lov amalga oshirilmagach, qurilish ishlari to‘xtab qolmasligi uchun “Xalq banki”ning tuman filialidan 11 milliard so‘m kredit olingan. So‘ngra qurilish ishlari to‘liq bajarilib, savdo do‘konlari egalariga topshirilgan. Shu kredit hisobidan bozor rahbariyatining 2 milliard so‘m qarzdorligi yuzaga kelgan.
“Ushbu qarzdorlikni qoplash maqsadida imkoniyatlar izlanib, blokdan bloklarga o‘tish joylarida yengil konstruksiyali savdo do‘konlari joylashtirilayotgan edi. Bu esa tadbirkorlar e’tiroziga sabab bo‘lgach, qurilish to‘xtatildi. Qurilgan do‘konlar esa buzib tashlandi”, — deyiladi hokimlik munosabatida.
“Daryo” muxbiri bilan suhbatlashgan viloyat bosh arxitektori Zuhriddin Muhiddinov ham bozordagi o‘zgarish bozor rahbariyatining o‘zboshimchaligi ekanligini ma’lum qildi.
“G‘ijduvon dehqon bozori” AJda bozor ma’muriyatining viloyat arxitekturasi nomidan bozor arxitekturasiga o‘zgartirish kiritilgani haqida gap-so‘zlar quloqqa chalindi. Biroq bizga loyihaga o‘zgartish kiritish bo‘yicha murojaat ham tushmaganini ma’lum qilamiz. Bilishimcha, bozor ma’muriyati uni o‘zboshimchalik bilan o‘zgartirishga harakat qilgan. Biroq loyiha o‘zgartirilmaydi. Asossiz qurilmalar qurish esa maqsadga muvofiq emas. Zero, bunday paytda yangi, zamonaviy bozor avvalgi bozordan farq qilmay qoladi”, — dedi bosh arxitektor Zuhriddin Muhiddinov.
Izoh (0)