«Ғиждувон деҳқон бозори»да бозор раҳбарияти томонидан ўзбошимчалик билан қурилган савдо дўконлари бузиб ташланди

Ғиждувон туман ҳокимлиги «Дарё» интернет нашрида эълон қилинган «‘Қарзимиз катта, ёпишимиз керак’. Бухородаги бозор раҳбари мавжуд қарздорлигини ёпиш учун ноқонуний павильон қуришга рухсат берган» сарлавҳали мақолага муносабат билдирди.

Маълум қилинишича, «Ғиждувон деҳқон бозори» акциядорлик жамияти раҳбари Вали Содиқовнинг мавжуд қарздорликни ёпиш учун ноқонуний павильон қуришга рухсат бергани ҳақидаги маълумотлар тумандаги масъул ташкилот мутахассислари томонидан ўрганилган.

Таъкидланишича, Президентнинг 2017 йил 27 мартдаги «2017—2019 йиллар даврида деҳқон бозорларини реконструкция қилиш ва уларнинг ҳудудида замонавий савдо мажмуалари қуриш дастурини тасдиқлаш тўғрисида»ги қарори асосида «Ғиждувон деҳқон бозори» АЖ савдо мажмуасида тадбиркорлар маблағлари ҳисобидан қурилиш-монтаж ишлари олиб борилиши назарда тутилган. Савдо дўкони қурилиши учун тадбиркорларга 30 кун муддат ичида тўловни 100 фоиз олдиндан тўлашлари тушунтирилган. Лекин тадбиркорлар томонидан белгиланган муддатда тўлов амалга оширилмагач, қурилиш ишлари тўхтаб қолмаслиги учун «Халқ банки»нинг туман филиалидан 11 миллиард сўм кредит олинган. Сўнгра қурилиш ишлари тўлиқ бажарилиб, савдо дўконлари эгаларига топширилган. Шу кредит ҳисобидан бозор раҳбариятининг 2 миллиард сўм қарздорлиги юзага келган.

«Ушбу қарздорликни қоплаш мақсадида имкониятлар изланиб, блокдан блокларга ўтиш жойларида енгил конструкцияли савдо дўконлари жойлаштирилаётган эди. Бу эса тадбиркорлар эътирозига сабаб бўлгач, қурилиш тўхтатилди. Қурилган дўконлар эса бузиб ташланди», — дейилади ҳокимлик муносабатида.

«Дарё» мухбири билан суҳбатлашган вилоят бош архитектори Зуҳриддин Муҳиддинов ҳам бозордаги ўзгариш бозор раҳбариятининг ўзбошимчалиги эканлигини маълум қилди.

«Ғиждувон деҳқон бозори» АЖда бозор маъмуриятининг вилоят архитектураси номидан бозор архитектурасига ўзгартириш киритилгани ҳақида гап-сўзлар қулоққа чалинди. Бироқ бизга лойиҳага ўзгартиш киритиш бўйича мурожаат ҳам тушмаганини маълум қиламиз. Билишимча, бозор маъмурияти уни ўзбошимчалик билан ўзгартиришга ҳаракат қилган. Бироқ лойиҳа ўзгартирилмайди. Асоссиз қурилмалар қуриш эса мақсадга мувофиқ эмас. Зеро, бундай пайтда янги, замонавий бозор аввалги бозордан фарқ қилмай қолади», — деди бош архитектор Зуҳриддин Муҳиддинов.