Vazirlar Mahkamasining qarori bilan Xalqaro imtihon tizimlari bo‘yicha yuqori ball (daraja) olgan yoshlarga imtihon topshirish xarajatlarini to‘liq qoplab berishning ma’muriy reglamenti tasdiqlandi, deb xabar beradi Telegram’dagi “Huquqiy axborot” kanali.
“Gazeta.uz”ning yozishicha, xarajatlarni qoplash uchun faqat imtihon topshirish paytida 31 yoshga to‘lmagan O‘zbekiston fuqarolari va O‘zbekistonda doimiy yashovchi fuqaroligi bo‘lmagan shaxslar Davlat xizmatlari markazlari yoki Yagona portal orqali murojaat qilishlari mumkin bo‘ladi.
5 ta xalqaro imtihon tizimi (IELTS, TOEFL, GMAT, GRE, SAT) bo‘yicha kompensatsiyalar 2021-yil 1-maydan boshlab to‘lanadi, yana 13 ta imtihon tizimi bo‘yicha xarajatlar 2022-yil 1-yanvardan qoplanishni boshlaydi (ya’ni imtihon xarajatlari yuqorida belgilangan sanada yoki undan keyin imtihon topshirgan yoshlarga qoplab beriladi — tahr.).
Xalqaro imtihon tizimlarida sertifikat olgan yoshlar 180 kunda davlat xizmatlari markazlariga yoki YaIDXP orqali (“My.gov.uz”) murojaat qilishi lozim bo‘ladi.
Ta’kidlanishicha, Davlat xizmatlari markazi 10 daqiqada, YaIDXP orqali esa avtomatik tarzda hujjatlar Yoshlar ishlari agentligiga yuboriladi. Agentlik esa 15 kunda arizachining sertifikatini verifikatsiyadan o‘tkazadi.
Sertifikat haqiqiyligi tasdiqlangach, 15 kunda kompensatsiya mablag‘lari agentlik tomonidan Xalq bankiga o‘tkaziladi va ariza beruvchiga SMS xabar yuboriladi.
Eslatib o‘tamiz, 2020-yilning 25-dekabrida O‘zbekiston yoshlari forumida ishtirok etgan Prezident Shavkat Mirziyoyev xalqaro ta’lim dasturlari bo‘yicha eng yuqori ballarni to‘plagan yoshlarga imtihon topshirish xarajatlari to‘liq qoplab berilishini ma’lum qilgandi.
Mavzuga doir:
- “Grant yutish uchun Eynshteyn bo‘lish shart emas”. 100 ming dollar grant yutib, Yevropaning 3 universitetida tahsil olayotgan o‘zbekistonlik talaba hikoyasi
- “Ta’lim tizimidagi adolatsizliklar sabab O‘zbekistondan ketganman”. Hindistonda yashayotgan va Bollivudda rol o‘ynagan qashqadaryolik yigit hikoyasi
Izoh (0)