Toshkent shahar Olmazor tumanida tilla taqinchoqlarini o‘g‘irlatgani haqida xabar bergan ayolning o‘ziga jinoiy ish ochildi, deya xabar qilmoqda Tergov departamenti.
Ma’lum qilinishicha, 2021-yilning 11-aprel kuni soat 15:30 larda ikki nafar noma’lum shaxs Olmazor tumani Farobiy ko‘chasida yashovchi 23 yoshli M.R. ismli ayolning uyiga kelib, unga yaqin kunlarda turmush o‘rtog‘i va farzandi og‘ir kasal bo‘lib vafot etishini aytib, o‘ziga tegishli barcha tilla taqinchoqlarini olib chiqib bersa, ularni qutqarib qolishga va’da berib, M.R.ga tegishli jami narxi 35 840 000 so‘mlik 10 xil turdagi tilla taqinchoqlarini aldov yo‘li bilan qo‘lga kiritib, hodisa joyidan yashiringan.
Mazkur holat yuzasidan Olmazor tumani bo‘yicha IIO FMB huzuridagi tergov bo‘limi tomonidan Jinoyat kodeksining 168-moddasi 2-qismi “a, b” bandlari (firibgarlik) bilan jinoyat ishi qo‘zg‘atilgan.
Olib borilgan tergov harakatlari davomida ushbu jinoyatni M.R.ning o‘zi sodir qilib, kelgusida sotish maqsadida ushbu tilla taqinchoqlarni yashash xonadonining yerto‘lasiga yashirib qo‘yganligi, unga nisbatan hech qanday firibgarlik jinoyati sodir qilinmaganligi aniqlangan.
Jinoyat ishi doirasida M.R. Jinoyat kodeksining 169-moddasi 2-qismi “b” bandi (o‘g‘rilik) bilan gumon qilinuvchi tariqasida jalb qilingan va uning xatti-harakatlariga qonun doirasida huquqiy baho berilishi ta’minlanadi.
Hozirda tergov harakatlari olib borilmoqda.
Bundan avval Namanganda 5-sinf o‘quvchisini uning kelinoyisi nima sababdan kanalga itarib yuborgani ma’lum qilingani, Andijondan olib qochilgan Spark Namanganda ehtiyot qismlariga ajratilgan holda topilgani hamda Farg‘onadagi Xizr buva ziyoratgohiga tashrif buyurganlarning cho‘ntagidan pul o‘g‘irlagan ayol ushlangani haqida xabar berilgandi.
Izoh (0)