O‘zbekistonda Sog‘liqni saqlash vazirligi, Oliy va o‘rta maxsus ta’lim vazirligi hamda Qurilish vazirligida 2020-yil davomida eng ko‘p korrupsiya holatlari kuzatilgan. Bu haqda agentlik mas’ul xodimi Bekzod Rahmonov ma’lum qildi.
Ma’lum qilinishicha, xalq ta’limi tizimida jami 78 milliard so‘m moliyaviy xato va kamchiliklar, noqonuniy o‘zlashtirishlar aniqlanib, qonuniy chora ko‘rish uchun huquq-tartibot organlariga yuborilgan.
“Gazeta.uz”ning xabar qilishicha, qonun buzilishi holatlariga yo‘l qo‘ygan 214 nafar mansabdor shaxsga nisbatan intizomiy jazo choralari qo‘llanilgan, 34 nafar mas’ul mansabdor egallab turgan lavozimidan ozod etilgan.
Sog‘liqni saqlash vazirligida 16 milliard so‘mlik moliyaviy xato va kamchiliklar aniqlangan va 22 milliard so‘m budjet mablag‘lari maqsadsiz sarflanishining oldi olingan.
Bundan avval Madaniyat vazirligi mansabdorlari musiqa asboblarini haqiqiy bozor bahosidan qariyb 800 million so‘m qimmatga sotib olgani aniqlangani, O‘zbekistonda 108,5 million dollarlik loyiha doirasida xarid qilingan tibbiy jihozlar yuzasidan jinoyat ishi qo‘zg‘atilgani hamda Surxondaryoda 741 million so‘mdan ortiq budjet mablag‘larini talon-toroj qilgan viloyat perinatal markazi mutasaddilariga jinoyat ishi ochilgani haqida xabar berilgandi.
Izoh (0)