Rossiya Tashqi ishlar vazirligi 16-aprel kuni Buyuk Britaniyaning Moskvadagi elchisi Debora Bronnertni vazirlik idorasiga chaqirdi. Bu haqda Meduza xabar berdi.
Bir kun oldin Buyuk Britaniya Tashqi ishlar vazirligi ham Rossiya elchisi Andrey Kelinni “Rossiyaning zararli xatti-harakatlari” munosabati bilan chaqirgan edi.
“Britaniya hukumati Rossiya davlatining zararli xatti-harakatlaridan qattiq xavotirda. Bugungi uchrashuvda davlat kotibi o‘rinbosari ser Filip Barton Buyuk Britaniyaning AQSh prezidenti Jo Bayden e’lon qilgan sanksiyalarini qo‘llab-quvvatlashini ma’lum qiladi”, — deyilgan edi Buyuk Britaniya bayonotida.
Bartonning ta’kidlashicha, Buyuk Britaniya AQShning “Rossiya SolarWinds dasturi orqali Amerika hukumati idoralariga uyushtirilgan kiberhujumga aloqador” degan fikriga qo‘shiladi. Shuningdek, Barton Rossiya qo‘shinlari Ukraina chegarasi yaqinida va Qrimda to‘planishidan xavotir bildirdi.
15-aprel kuni AQSh Rossiyaga qarshi yangi sanksiyalar joriy qildi. Yangi sanksiyalar Rossiyaning AQShdagi 2020-yilgi prezidentlik saylovlariga aralashishi, AQSh hukumat idoralariga qilingan kiberhujum va Rossiyaning Afg‘onistondagi amerikaliklarga qarshi “Tolibon” jangarilari bilan til biriktirgani bilan bog‘liq. Oq uy fevral oyida Rossiyaning ushbu harakatlari uchun AQSh rasmiylari unga qarshi sanksiyalar rejalashtirayotganini aytgandi.
Polsha AQShning Rossiyaga qarshi sanksiyalarini qo‘llab-quvvatladi. Polsha Varshavadagi uch nafar rossiyalik diplomatni persona non grata deb e’lon qildi, ular mamlakatdan chiqarib yuboriladi. Birgalikda qabul qilingan, kelishilgan ittifoq qarorlari Rossiyaning dushmanlik harakatlariga eng munosib javobdir”, — deyiladi Polsha xabarida.
O‘z navbatida NATO ham AQShning Rossiyaga qarshi yangi sanksiyalarni mamnuniyat bilan qo‘llab-quvvatlamoqda. NATO Rossiyani Yevro-Atlantika xavfsizligiga tahdid deb bilmoqda va Moskvani “beqarorlashtiruvchi xatti-harakatlarni darhol tugatishga va ittifoqchilar singari o‘z majburiyatlarini, xususan, qurol nazorati, qurolsizlantirish va qurolni tarqatmaslik shartlarini bajarishga chaqirdi”.
“RBK” xabariga ko‘ra, Oq uy vakili Jen Psaki AQSh prezidenti Jo Baydenning rossiyalik hamkasbi Vladimir Putin bilan uchrashuv o‘tkazish to‘g‘risidagi taklifi AQSh hukumati Rossiyaga qarshi yangi sanksiyalarni joriy etganiga qaramay amalda qolganini ma’lum qilgan.
13-aprel kuni Putin va Bayden o‘rtasida telefon orqali suhbat bo‘lib o‘tgan edi, unda AQSh prezidenti Putin bilan shaxsan uchrashishni hamda Moskva va Vashington o‘rtasidagi munosabatlarni muhokama qilishni taklif qildi. Keyinchalik Psaki Putin va Bayden o‘rtasidagi uchrashuv yaqin oylarda bo‘lib o‘tishi mumkinligini ma’lum qildi.
Izoh (0)