Fransiya poytaxti Parijda kuchli yong‘in tufayli vayron bo‘lgan Notr-Dam ibodatxonasi 2024-yilga qadar qayta tiklanishi mumkin. Fransiya madaniyat vaziri Rozlin Bashloning ta’kidlashicha, rekonstruksiya ishlari uchun 830 million yevro xayriya mablag‘lari yig‘ilgan. Inshootning xavfsizligini ta’minlash bo‘yicha ishlar yozda yakunlanadi va bir vaqtning o‘zida tiklash boshlanadi. Notr-Dam ibodatxonasining hozirgi ko‘rinishi haqida “RBK” fotoreportaj tayyorladi.
Fransiya prezidenti Emmanuel Makron 15-aprel kuni soborni ziyorat qildi va uni 2024-yilga kelib mehmonlarga ochish rejasini tasdiqladi. “Ko‘rib turganimizdek, ikki yil ichida juda katta hajmdagi ishlar amalga oshirildi”, — dedi davlat rahbari.
Aprel oyi boshida rasmiylar ibodatxona rekonstruksiyasi uchun yana 15 yoki 20 yil vaqt ketishi mumkinligini aytgan edi. Ammo ular Notr-Dam 2024 yilgacha hech bo‘lmaganda ibodat uchun ochiq bo‘lishini va’da qildi.
Ibodatxona mutasaddisi Patrik Shove AP’ga shunday bayonot berdi: “Bugun men sobor saqlanib qoldi, deb bemalol ayta olaman. U yaxshi himoya bilan ta’minlandi, endi biz butun boshli binoning barqarorligini buzmaydigan ulkan rekonstruksiya ishlarini amalga oshirsak ham bo‘ladi”.
Notr-Dam 2019-yilning 15-aprelida yonib ketgan edi. Yong‘in 12 soatdan ko‘proq davom etgan. Natijada tirgak va tomning uchdan bir qismi qulab tushgan. Prokuratura ibodatxona qasddan yoqib yuborilgani haqidagi taxminlarni rad qilib, yong‘in sababi elektr simlarining nosozligi yoki o‘chirilmagan sigaret qoldig‘i bo‘lishi mumkin, deb hisoblaydi. Shuningdek, Patrik Shove yong‘in kompyuter ishi nosozligi oqibatida yuzaga kelgan bo‘lishi mumkinligini aytgan.
Fransiya prezidenti yong‘in sodir bo‘lganidan so‘ng, besh yil ichida soborni qayta ochishni maqsad qilgan va tiklash uchun ma’sul bo‘lgan maxsus vakilini tayinlagan. Parij arxitektura byurosi qayta tiklash loyihasini ishlab chiqib, sobor tomini shisha, eman va uglerod tolasidan qayta qurish taklif qilgan. Aynan bino ishga tushiriladigan 2024-yilda Parijda yozgi Olimpiya o‘yinlari o‘tkazilishi kerak.
Izoh (0)