Turkiya iyun oyida “Istanbul” kanali qurilishi loyihasini amalga oshirishni boshlashi mumkin. Bu haqda mamlakat prezidenti Rajab Toyyib Erdo‘g‘on 16-aprel kuni, juma namozidan keyin jurnalistlarga ma’lum qildi, deb yozadi “TASS”.
“Biz ‘Istanbul’ kanali qurilishini kanalni kesib o‘tuvchi ko‘priklarni qurish bilan boshlamoqchimiz. Umid qilamanki, iyun oyida shunday ko‘priklardan birini qurish ishlarini boshlaymiz”, — dedi Turkiya rahbari.
Erdo‘g‘on loyihalashtirilgan kanalning ikkala tomonida ko‘priklar qurish jarayoni boshlanishi zarurligiga ishora qildi. Shuningdek, u Turkiya “Istanbul” kanali loyihasi xorijiy sarmoyalarni jalb qilmasdan amalga oshirilishiga umid qilayotganini qo‘shimcha qildi.
14-aprel kuni Turkiya prezidenti Toyyib Erdo‘g‘on loyihalashtirilgan “Istanbul” kanali Montryo konvensiyasiga taalluqli emasligini e’lon qilgan.
1936-yilda imzolangan Montryo konvensiyasi mamlakatlar yuk kemalarining Bosfor va Dardanel bo‘g‘ozlaridan foydalanishini tartibga soladi. Bu Turkiyaga o‘z chegaralaridagi bo‘g‘ozlarni boshqarish huquqini beradi va ularga tinchlik davrida fuqarolik kemalarining kirishini kafolatlab, harbiy-dengiz kemalarining kirishini cheklaydi. Turkiyaning Istanbul shimolidagi Qora dengizni janubdagi Marmara dengizi bilan bog‘laydigan ulkan “Istanbul” kanalini qurish loyihasi aslida konvensiya shartlariga zid hisoblanadi.
Avvalroq mazkur masalada hukumatni tanqid qilgan sobiq admirallar (harbiy flotdagi oliy unvon sohibi) hibsga olingan edi. Keyinroq Anqara sudi provinsiyani tark etmaslik sharti bilan admirallarni ozod qildi.
Eslatib o‘tamiz, Rossiya prezidenti Vladimir Putin va Turkiya prezidenti Rajab Toyyib Erdo‘g‘on videokonferensaloqa rejimida Turkiyadagi “Akkuyu” atom elektr stansiyasi (AES)ning uchinchi energiya bloki qurilishiga start berdi. Turkiya prezidenti stansiyaning so‘nggi blokini qurish 2022-yilga rejalashtirilganini ma’lum qilgan.
Izoh (0)