AQSh Milliy razvedkasi direktori Evril Xeyns AQSh Senati qo‘mitasi yig‘ilishida razvedka xizmatlarida COVID-19 kelib chiqishi to‘g‘risida ishonchli ma’lumot yo‘qligini aytdi. Bu haqda “RBK” xabar berdi.
“Ayni paytda biz razvedka hamjamiyati koronavirus infeksiyasi qayerdan kelib chiqqani to‘g‘risida aniq ma’lumotga ega emas, deb ochiq aytishimiz mumkin”, — dedi Xeyns.
U infeksiya paydo bo‘lishining ikkita “muqobil versiyasi” mavjudligini ta’kidladi. Ulardan biriga ko‘ra, kasallikni yuqtirgan birinchi odam virus tashuvchi hayvon bilan aloqada bo‘lgan. Boshqa bir versiyada virus Uxan shahridagi ma’lum bir Xitoy laboratoriyasidan tasodifan tarqalgani aytilgan.
Markaziy razvedka boshqarmasi direktori Uilyam Berns agent Xeynsning fikriga qo‘shilishini aytdi. Uning ta’kidlashicha, Xitoy hukumati Jahon sog‘liqni saqlash tashkiloti (JSST)ga zarur ma’lumotlarni taqdim etishda yetarlicha yordam ko‘rsatmagani sababli vaziyat murakkablashmoqda.
Avvalroq CNN’ning razvedka xizmatidagi manbasi fuqarolar hech qachon koronavirus kelib chiqishi haqidagi haqiqatni bilmasligi mumkin, deb taxmin qilgandi. “Hatto xitoyliklar ham buni bilmaydi. Ular haqiqatni bilishdan manfaatdor bo‘lmagani sababli josuslik qilish va xitoyliklar qanday natijalarga erishganini aniqlashga urinishdan foyda yo‘q”, — degan edi CNN.
Yanvar—fevral oylarida xalqaro ekspertlar missiyasi Xitoyning Uxan shahrida COVID-19 patogenining kelib chiqishini o‘rganib chiqdi. Ushbu safar natijalari to‘g‘risidagi hisobot JSST tomonidan 30-mart kuni e’lon qilindi. Hisobotda infeksiyaning kelib chiqishi to‘g‘risida to‘rtta ehtimoliy versiya bayon qilingan.
Xitoydagi tekshiruvida ishtirok etgan mutaxassislar koronavirusning odamlar orasida paydo bo‘lishi va tarqalishiga sabab Uxan shahridagi yovvoyi hayvonlarning savdosi bo‘lishi mumkinligini aytgandi. Taxminlarga ko‘ra, bozorda sotilgan hayvonlardan biri virusni ko‘rshapalakdan odamga yuqtirgan oraliq tashuvchiga aylangan.
Shuningdek, chumolixo‘rlar turkumiga yaqin sutemizuvchi — pangolinlar odamlarga koronavirus yuqtirishda “gumon qilinayotganlar” qatoriga kiritilgan edi. Xuddi ko‘rshapalaklar singari ular ham Xitoyda iste’mol qilinadi. Ba’zi olimlar aynan tanasida virus bo‘lgan pangolinlar Uxan shahridagi qishloq xo‘jaligi bozoriga keltirilgan va xitoyliklar tomonidan iste’mol qilingan bo‘lishi mumkin, deb taxmin qilgan edi.
Avvalroq JSST tomonidan pandemiya boshida Uxanda koronavirusning 10 dan ortiq mutatsiyasi paydo bo‘lgani, Uxan shahrida COVID-19 kelib chiqishiga oid muhim dalillar topilgani, Xitoy hukumati COVID-19’ga chalinish bo‘yicha ilk holatlar haqidagi ma’lumotlarni berishdan bosh tortgani haqida xabar berilgandi.
Izoh (0)