Eron uranni boyitish darajasini 60 foizga chiqarganini ma’lum qildi

Eron uranni boyitish darajasini 60 foizga chiqarishga muvaffaq bo‘ldi. Bu haqda Eron parlamenti raisi Muhammad Bakir Galibafga tayanib “Interfaks” xabar qildi.

“Eronlik olimlar o‘tgan tun yarmida uranni 60 foizga boyitishga muvaffaq bo‘ldi”, — dedi parlament raisi. Galibafning aniqlik kiritishicha, bu mahalliy vaqt bilan juma kuni soat 00:40 da (Toshkent vaqti bilan 01:10) sodir bo‘lgan.

Eron Atom energiyasi tashkiloti rahbari Ali Akbar Solih, o‘z navbatida, “hozirda 60 foizgacha boyitilgan soatiga to‘qqiz gramm uran ishlab chiqarilmoqda”, dedi.

Bir kun oldin Yevropa Ittifoqi diplomatiyasi rahbarining rasmiy vakili Peter Stano Eronning uranni 60 foizgacha boyitish to‘g‘risidagi qarori Eron yadro dasturi bo‘yicha Qo‘shma harakat rejasi qo‘shma komissiyasining Venadagi kengashiga zid kelishini aytgan edi.

Ilgari Buyuk Britaniya, Germaniya va Fransiya hukumatlari Eron tomonidan uranni 60 foizga boyitishni boshlash to‘g‘risidagi qarordan xavotirda ekani haqida uch davlatning Tashqi ishlar vazirliklari rasmiy vakillari ma’lum qilgan edi.

Eronning yadro dasturi bo‘yicha Qo‘shma harakatlar rejasi ishtirokchisi bo‘lgan Yevropaning mazkur uch davlati fikriga ko‘ra, Erondan kelgan ushbu xabar “Qo‘shma harakat a’zolari va AQShning yadro dasturini qayta tiklash bo‘yicha tezroq diplomatik yechimni topish uchun mazmunli muhokamalarni boshlagan bir paytda juda achinarli holat”.

London, Berlin va Parij Eronning so‘nggi “xavfli xabarlari” ushbu muzokaralarning konstruktiv ruhi va xayrixohligiga zid keladi, deb hisoblamoqda. Ular Eronni “diplomatik jarayonni yanada murakkablashtirmaslikka” chaqirdi.

Eron 14-apreldan boshlab uranni 60 foizgacha boyitish ishlarini boshlagan edi. Eron prezidenti Hasan Ruhoniy Tehronning bunday qaror qabul qilishi Isroilning Natanzdagi yadro obyektiga uyushtirgan hujumiga o‘ziga xos javob ekanini aytgan.

“Uranni 60 foizgacha boyitish bu shafqatsizlikka qarshi javobdir”, — deya Ruhoniy voqeadan zarar ko‘rgan IR-1 sentrifugalari zamonaviy va uranni ancha tezroq boyitadigan rivojlangan IR-6 sentrifugalari bilan almashtirilishini ta’kidlagan.

Bundan tashqari, Eron yana minglab so‘nggi avlod sentrifugalarini foydalanishga topshirishni rejalashtirmoqda.

11-aprelda Natanzdagi Ahmad Roshan nomli uranni boyitish kompleksida elektr ta’minotini taqsimlash tizimida muammolar kuzatilgan. Ali Akbar Solihiy tizimdagi nosozlik “yadro terrorchiligi” harakati tufayli yuzaga kelganini bildirgan. Ammo u mazkur harakatlar ortida qaysi kuchlar turganligi borasida muayyan fikr bildirmaslikka qaror qilgan.